काठमाडौं । प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ता हित समितिले किसानलाई रासायनिक मल सहज रूपमा वितरण गर्न आवश्यक व्यवस्थापन गर्न सरकारलाई निर्देशन दिएको छ।
सिंहदरबारमा आइतबार बसेको समितिको बैठकले किसानलाई मल अभाव नहोस् भनी सम्बन्धित जिल्लाका प्रमुख जिल्ला अधिकारी र स्थानीय जनप्रतिनिधिको निगरानीमा रासायनिक मल वितरण गर्न कृषि मन्त्रालयलाई निर्देशन दिएको छ। साथै, स्थानीय तहमा मल भण्डारण स्थल निर्माण गरी सहज, सुलभ र गुणस्तरीय मल उपलब्ध गराउन पनि सुझाव दिइएको छ।
समिति सभापति अव्दुल खानका अनुसार, रासायनिक मलको आयात र बिक्री वितरणमा संलग्न संस्थाको क्षमता तथा हालको अवस्था विश्लेषण गरी आयात कोटाको पुनरावलोकन र प्रतिशत निर्धारण गर्न उद्योग र कृषि मन्त्रालयलाई निर्देशन दिइएको छ।
बैठकमा कृषि तथा पशुपन्छी विकासमन्त्री रामनाथ अधिकारीले समयमा मल नपुगेमा उत्पादनमा असर पर्ने हुँदा किसानलाई आवश्यक समयमा मल उपलब्ध गराउन प्रयास भइरहेको जानकारी दिनुभयो। उनले हाल कोटा बढाउन कठिनाइ रहेको र मल खरिदका लागि छुट्टै संस्था आवश्यक रहेको बताए।
समितिका सदस्यहरूले प्रत्येक वर्ष किसानलाई मल अभाव हुने समस्या दोहोरिने भएकाले यसको दिर्घकालीन समाधान खोज्नुपर्नेमा जोड दिएका छन्।
यस निर्देशले नेपालको कृषिक्षेत्रमा रासायनिक मलको आपूर्ति र वितरणमा सुधार ल्याउने अपेक्षा गरिएको छ।
