काठमाडौं । रिक्त राज्य व्यवस्था तथा सुशासन समिति सभापतिको निर्वाचनको कार्यतालिका प्रकाशन भएको छ। सभामुख देवराज घिमिरेले राज्य व्यवस्था समितिको सभापतिको निर्वाचन बुधबार तोकेको संघीय संसदको महासचिव पद्मप्रसाद पाण्डेयले जानकारी दिए।
सूचनामा भनिएको छ, ‘प्रतिनिधि सभा अन्तर्गतको राज्यव्यवस्था तथा सुशासन समितिमा रिक्त रहेको सभापति पदको निर्वाचनको लागि प्रतिनिधि सभा नियमावली, २०७९ को नियम १७६ को उपनियम (१) बमोजिम सम्माननीय सभामुखले मिति २०८२ साल भदौ ११ गते बुधबारको दिन तोक्नुभएको बेहोरा माननीय सदस्यहरूको जानकारीका लागि यो सूचना प्रकाशित गरिएको छ ।’
कुलिङ पिरियड सम्बन्धी व्यवस्थामा गडबडी गरेको पाइएपछि विवादित बनेका समिति सभापति रामहरी खतिवडाले राजीनामा दिएपछि रिक्त रहेको हो।
कांग्रेस र एमालेको सहमति रहेकाले यो पदमा अन्य दलको दाबी छैन। नेपाली कांग्रेसले राज्य व्यवस्था समितिको सभापतिको उम्मेवारको टुंगो नलगाउँदा निर्वाचनको सूचना प्रकाशन गर्न समस्या भएको थियो।
निर्वाचनको सूचना प्रकाशनका लागि सभामुख घिमिरेले आइतबार कांग्रेस प्रमुख सचेतक श्याम घिमिरेसँग पटक-पटक छलफल गरेका थिए। कांग्रेस प्रमुख सचेतकले पार्टीको निर्णय पर्खिन अनुरोध गरेपछि सभापति खतिवडाले साउन २८ गते राजीनामा दिएको भन्दै चाडै निर्णय लिन सभामुखले दबाब दिएका थिए। कांग्रेस आजको पदाधिकारी बैठकमा राज्य व्यवस्था तथा सुशासन समिति सभापति र उपसभामुख इन्दिरा रानामगरका बारेमा उठेका प्रश्नमाथि छलफल हुने बताइएको छ।
