काठमाडौं । स्वास्थ्य तथा जनसंख्या मन्त्रालय अन्तर्गतको स्वास्थ्य सेवा विभागले देशभर रेबिजविरुद्धको खोप (भ्याक्सिन) र सर्पदंश उपचारमा प्रयोग हुने भेनम औषधि सातै प्रदेशमा आपूर्ति गरेको छ।
विभाग अन्तर्गतको व्यवस्थापन महाशाखाका प्रमुख डा. पवनजंग रायमाझीका अनुसार, यसअघि नै खरिद गरिएको औषधि हाल प्रदेशका स्वास्थ्य संस्थामा वितरण गर्ने गरी सम्बन्धित आपूर्ति केन्द्रमा पठाइएको हो।
हालै रेबिज र सर्पदंश उपचारमा आवश्यक औषधिको अभाव भएको समाचार सार्वजनिक भएपछि स्वास्थ्य तथा जनसंख्यामन्त्री प्रदीप पौडेलले चासो देखाउँदै सम्बन्धित अधिकारीलाई तत्काल आपूर्तिको व्यवस्था मिलाउन निर्देशन दिएका थिए। मन्त्री पौडेलले भविष्यमा समेत औषधिको अभाव नहुने गरी आपूर्ति प्रणालीलाई प्रभावकारी बनाउन आवश्यक निर्देशन दिएका थिए।
स्वास्थ्य सेवा विभागले सोही निर्देशनअनुसार सातै प्रदेशमा रेबिज र सर्पदंश उपचारका लागि आवश्यक खोप तथा औषधि आपूर्ति गरेको हो। विभागका अनुसार हालसम्म रेबिजविरुद्ध प्रयोग हुने ५१ हजार १८० भायल भ्याक्सिन प्रदेश आपूर्ति केन्द्रमा पुगीसकेको छ।
सबैभन्दा धेरै खोप बाग्मती प्रदेशमा आपूर्ति गरिएको छ। बाग्मतीमा १० हजार ८० भायल रेबिजविरुद्धको खोप र १ हजार भायल सर्पदंशविरुद्धको भेनम आपूर्ति गरिएको छ। सर्पदंशका बढी समस्या देखिने मधेस प्रदेशमा भने सबैभन्दा धेरै २ हजार ५ सय भेनम र करिब ५ हजार भायल रेबिजविरुद्धको खोप पठाइएको मन्त्रालयका प्रवक्ता डा. प्रकाश बुढाथोकीले जानकारी दिए।
मागको आधारमा अन्य प्रदेशहरूमा पनि औषधि आपूर्ति गरिएको छ। विभागले अहिले गरिएको आपूर्तिको चार गुणा बढी औषधि आगामी दुई महिनाभित्र आपूर्ति हुने व्यवस्था गरिएको जनाएको छ।
