काठमाडौं । गायक तथा अभिनेता प्रशान्त तामाङको पार्थिव शरिरलाई जन्मथलो दार्जिलिङमा अन्त्येष्टि गरिएको छ । उनको जन्मगाउँ तल्लो तुमसुङ नजिकको आलुबारीमा अन्त्येष्टि गरिएको हो ।
बौद्ध परम्पराअनुसार तामाङको पार्थिव शरिरलाई अन्त्येष्टि गरिएको जानकारी प्रशान्तका निकट मित्र तथा कलाकार राजेश घतानीले दिए । उनका अनुसार, बौद्ध लामाहरूले अग्निदहन र विधिपूर्वक अन्त्येष्टि गरेका थिए ।
अन्त्येष्टिमा प्रशान्तकी पत्नी मार्था एली तामाङसहित आफन्त र बौद्ध लामाहरू सहभागी थिए । त्यसअघि उनको शवलाई दार्जिलिङमा अन्तिम श्रद्धाञ्जलीका लागि राखिएको थियो । आइतबार नयाँ दिल्लीमा हृदयघातले प्रशान्तको मृत्यु भएको थियो ।
