काठमाडौं । प्रधानमन्त्री पुष्पकमल दाहाल ‘प्रचण्ड’को काँधमा थप दुई मन्त्रालयको जिम्मेवारी थपिएको छ। राष्ट्रपति रामचन्द्र पौडेलले स्वास्थ्य तथा जनसंख्या र वन तथा वातावरण मन्त्रालयको जिम्मेवारी प्रधानमन्त्रीले सम्हाल्ने गरी तोकेको शीतलनिवासबाट जारी विज्ञप्तिमा उल्लेख छ।
स्वास्थ्य तथा जनसंख्यामन्त्री प्रदीप यादव र वन तथा वातावरण मन्त्री नवलकिशोर साह सुडीले राजीनामा दिएपछि ती मन्त्रालयको जिम्मेवारी प्रधानमन्त्रीले सम्हाल्ने गरी तोकेका हुन्।
गत शुक्रबार स्वास्थ्य तथा जनसंख्यामन्त्री प्रदीप यादव, वन तथा वातारण मन्त्री नवलकिशोर साह सुडी र स्वास्थ्य राज्यमन्त्री हसिना खानले प्रधानमन्त्रीसमक्ष राजीनामा बुझाएका थिए।
एमालेले सरकारको साथ छाडेपछि प्रचण्ड सरकार अल्पमतमा परेको छ। एमालेपछि जसपाले पनि सरकार छाडेर समर्थन फिर्ता लिइसकेको छ। एमालेले छाडेका ७ सहित अब प्रधानमन्त्रीले सम्हालेका मन्त्रालयको संख्या ९ पुगेको छ।
प्रधानमन्त्री प्रचण्डले असार २८ गते संसदमा विश्वासको मत लिन संसद सचिवालयमा पत्र पठाएका छन्।
