काठमाडौं । नेकपा (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले जेनजी पुस्ताका मागहरू पूरा गर्न माओवादीसँग मिलेर चुनाव लड्नुपर्ने बताएका छन्।
महोत्तरीको रामगोपालपुरमा आयोजित कार्यक्रममा सम्बोधन गर्दै उनले भने, “अब जेनजी र माओवादी मिलेर चुनाव लड्नुपर्छ र मात्रै जेनजीका माग पूरा हुन सक्छन्। अरू कसैले जेनजीका माग पूरा गर्दैनन्।”
प्रचण्डले प्रत्यक्ष निर्वाचित कार्यकारी, पूर्ण समानुपातिक निर्वाचन प्रणाली र समावेशी लोकतन्त्र माओवादीको ऐतिहासिक एजेन्डा भएको उल्लेख गरे। उनका अनुसार यी एजेन्डाको विरोध गर्नेहरूले जेनजी पुस्ताको भावना बुझ्नै सक्दैनन्।
उनले थपे, “जो प्रत्यक्ष निर्वाचित कार्यकारी, पूर्ण समानुपातिक निर्वाचन प्रणाली र समावेशी लोकतन्त्रका विरुद्धमा छन्, तीले जेनजीको भावना बुझ्नै सक्दैनन्। त्यसैले म पेरिसडाँडादेखि नै निरन्तर जेनजीलाई माओवादीसँग हातेमालो गर्न अपिल गर्दै आएको छु।”
प्रचण्डले जेनजी पुस्तालाई आफ्ना “मित्र र बैरी” छुट्याउन पनि आग्रह गरे। “आजका जेनजीले आफ्नो मित्र र दुस्मन को हो, त्यो चिन्न सक्नुपर्छ। आफ्ना अभिभावक र मित्रलाई दुस्मनजस्तो र दुस्मनलाई मित्रजस्तो ठान्ने हो भने त्यो देशका लागि ठूलो दुर्भाग्य हुनेछ,” उनले चेतावनी दिए।
कार्यक्रममा विभिन्न पार्टी छोडी ठूलो संख्यामा माओवादी प्रवेश गरिएको उल्लेख गर्दै प्रचण्डले तीमध्ये करिब ६० प्रतिशत जेनजी रहेको जानकारी दिए। उनले भने, “खादा लगाइँदिदा थाक्ने गरी माओवादी प्रवेश भएको छ, तीमध्ये ६० प्रतिशत जेनजी छन्।”
जनयुद्ध र जनआन्दोलनको सन्दर्भ स्मरण गर्दै उनले आफू पनि त्यतिबेला जेनजी नै भएको दाबी गरे। “हिजो जनयुद्ध र जनआन्दोलन गर्दा हामी पनि जेनजी नै थियौं। आज मधेशमा जेनजी आन्दोलनपछिको यो अतिभव्य कार्यक्रममा सयौँ–सयौँ, हजारौँ जेनजी माओवादी केन्द्रमा प्रवेश गरेका छन्,” प्रचण्डले भने।
