काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले संगठन सुदृढीकरणका लागि आत्मसमीक्षा गर्दै जनसम्पर्क विस्तारमा सक्रिय हुन नेताहरूलाई निर्देशन दिएका छन्।
सुदूरपश्चिम प्रदेश समिति सचिवालयको भर्चुअल बैठकलाई सम्बोधन गर्दै उनले पार्टीभित्रका बहस, संगठनात्मक अवस्था र आगामी रणनीतिबारे विस्तृत धारणा राखे। प्रचण्डले हाल माओवादीप्रति जनविश्वास बढ्दै गएको दाबी गर्दै त्यसलाई संगठनात्मक संरचनामा रुपान्तरण गर्न सक्नुपर्ने आवश्यकता औंल्याए।
उनले भने, “दसैंपछि मध्य पहाडी लोकमार्ग अभियान र केन्द्रीय बैठकहरू सकिएपछि दुई दिनको समय निकालेर म सुदूरपश्चिममै आएर प्रत्यक्ष संवाद गर्नेछु।”
बैठकमा उनले प्रदेशमा देखिएको वैचारिक, राजनीतिक र संगठनात्मक सुधारलाई आधार बनाएर गाउँ–बस्तीस्तरमा पुगेर कमिटी निर्माण, विस्तार र प्रशिक्षणमा जोड दिन आग्रह गरे। साथै, आत्मसमीक्षा र आलोचना–आत्मालोचनाको संस्कृतिलाई मजबुत बनाउँदै विगतका कमजोरीहरूको गम्भीर समीक्षा गर्नुपर्ने बताए।
उनका अनुसार पार्टी सरकारमा रहँदा प्राप्त उपलब्धिहरू, त्यसपछिको खबरदारी अभियान र जनसंगठनहरूले सञ्चालन गरेका गतिविधिले जनविश्वास पुनः बढाएको छ।
पछिल्ला दिनमा अध्यक्ष प्रचण्ड र उपमहासचिव जनार्दन शर्माबीच आन्तरिक असहमति देखिएको प्रसंग बैठकमा उठ्दै गर्दा उनले स्पष्ट पारे, “हाम्रो पार्टी मात्र यस्तो पार्टी हो जहाँ कार्यकर्ताले देखेको कुरा खुला रूपमा राख्न सक्छन्। पदाधिकारीदेखि स्थायी समिति बैठकसम्म खुला छलफल गर्ने संस्कार माओवादी केन्द्रमै छ।”
माओवादी केन्द्रले संगठनात्मक बल वृद्धिका लागि आगामी दिनमा व्यापक अभियान सञ्चालन गर्ने तयारी गरेको बैठकले जनाएको छ।
