काठमाडौं । नेकपा (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले नेपालमा सरकारको निगरणीबाहिर समानान्तर बजेट सञ्चालन भइरहेकामा गम्भीर चिन्ता व्यक्त गरेका छन्।
मंगलबार माओवादी केन्द्रको समाजकल्याण विभागद्वारा ललितपुरमा आयोजित अन्तरक्रिया कार्यक्रममा उनले विदेशी दातृ संस्थाहरू तथा आईएनजीओ/एनजीओहरूका नाममा ठूलो परिमाणमा अनुदान रकम नेपाल भित्रिएको र त्यो रकम सरकारको औपचारिक बजेटभन्दा पनि ठूलो देखिने अवस्था सिर्जना भएको बताए।
“सरकारभन्दा बाहिर समानान्तर बजेट चलेको देखिन्छ,” प्रचण्डले भने, “आईएनजीओ र एनजीओमार्फत ठूलो रकम सिधै नेपाल भित्रिन्छ, र राज्य त्यसप्रति बेखबर देखिन्छ।”
उनले नेपाल जस्तो गरिब मुलुकमा विदेशी शक्ति राष्ट्रहरू र पुँजीपति वर्गले लगानीलाई ‘प्रभाव विस्तार गर्ने हतियार’को रूपमा प्रयोग गरिरहेको आरोप लगाए। “शक्ति राष्ट्रहरू र ठूला पुँजीपतिहरूले आफ्नो प्रभाव र प्रभूत्व विस्तार गर्नका लागि अनुदान, संघ-संस्थाहरूको निर्माण र प्रयोग गर्छन्,” उनले बताए।
पूर्वप्रधानमन्त्री प्रचण्डले यस्तो रकम र कार्यक्रमलाई राज्यको नियमन, लेखा प्रणाली तथा अनुगमन प्रणालीभित्र ल्याउनुपर्नेमा जोड दिए। “यसलाई नियन्त्रण र पारदर्शी बनाउन नसक्ने हो भने जनयुद्धका बेला उठाइएको सवालहरू आज पनि सम्बोधन नहुने हुन्,” उनले चेतावनी दिए।
साथै उनले विदेशी अनुदानलाई विशुद्ध सेवाभावको रूपमा बुझ्नु गलत हुने टिप्पणी गरे। “राजनीतिक उद्देश्य बिना अनुदान आउँछ भन्ने बुझाई सही होइन,” प्रचण्डले स्पष्ट पारे, “विश्वभर प्रभाव विस्तार गर्न नै यस्तो सहायता दिइन्छ।”
उनको टिप्पणी हालसालै विदेशी सहायता, विकास साझेदारी तथा आईएनजीओहरूको भूमिकामाथि बढ्दो प्रश्न उठिरहेका बेला आएको हो।
