काठमाडौं। नेपाल आयल निगमले पेट्रोलियम पदार्थमा एकैपटक १५ रुपैयाँ प्रतिलिटर मूल्य बढाएपछि यसको प्रभाव अब यातायात भाडा, ढुवानी लागत र दैनिक उपभोग्य वस्तुको मूल्यमा देखिन सक्ने चिन्ता बढेको छ।
नेपाल आयल निगमले बुधबार साँझ जारी गरेको सूचनाअनुसार पेट्रोल, डिजेल र मट्टीतेलमा १५-१५ रुपैयाँ मूल्यवृद्धि गरिएको हो। नयाँ मूल्य बुधबार रातिदेखि लागू भएको निगमले जनाएको छ।
मूल्य समायोजनपछि पेट्रोलको मूल्य पहिलो वर्गमा प्रतिलिटर १८४ रुपैयाँ पुगेको छ। दोस्रो वर्गमा १८६ रुपैयाँ र तेस्रो वर्गमा १८७ रुपैयाँ निर्धारण गरिएको छ। यसअघि पहिलो वर्गमा पेट्रोल १६९ रुपैयाँ ५० पैसामा बिक्री हुँदै आएको थियो।
त्यस्तै डिजेल तथा मट्टीतेलको मूल्य पनि पहिलो वर्गमा १६४ रुपैयाँ ५० पैसा पुगेको छ। दोस्रो वर्गमा १६६ रुपैयाँ र तेस्रो वर्गमा १६७ रुपैयाँ प्रतिलिटर कायम गरिएको निगमले जनाएको छ।
निगमले चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जलाई पहिलो वर्गमा राखेको छ। सुर्खेत र दाङ दोस्रो वर्गमा तथा काठमाडौं, पोखरा र दिपायल तेस्रो वर्गमा परेका छन्।
विशेषगरी डिजेलको मूल्यवृद्धिले सार्वजनिक यातायात, निर्माण क्षेत्र र कृषि उत्पादनको लागत बढाउने भएकाले केही दिनमै बजारमा यसको असर देखिन सक्ने व्यवसायीहरूको भनाइ छ। यातायात व्यवसायीले पनि नयाँ इन्धन मूल्यअनुसार भाडा समायोजनको माग गर्न सक्ने संकेत गरेका छन्।
अन्तर्राष्ट्रिय बजारमा मूल्य उतारचढाव र खरिद लागत बढेकाले मूल्य समायोजन गरिएको निगमको दाबी छ। तर उपभोक्ता स्तरमा भने यसले फेरि महँगीको दबाब बढाउने देखिएको छ।
