काठमाडौं । नेकपा माओवादी केन्द्रकी उपाध्यक्ष पम्फा भुसालले देशको जिम्मा अब माओवादीको काँधमा आउँदै गरेको दाबी गरेकी छन्। काठमाडौंको प्रज्ञा भवनमा जारी केन्द्रीय समितिको बैठकलाई सम्बोधन गर्दै उनले पार्टीभित्र प्रष्ट र बलियो वैचारिक धार आवश्यक भएको बताइन्। अध्यक्ष पुष्पकमल दाहाल ‘प्रचण्ड’ को भूमिकाले मुलुकमा ठूलो क्रान्ति र परिवर्तन भएको उल्लेख गर्दै उनले संविधान जारी हुनसमेत प्रचण्डकै योगदान निर्णायक भएको धारणा राखिन्।
भुसालले जेनजी आन्दोलनपछि माओवादीले उठाउँदै आएको एजेण्डा पुनः अगाडि आएको भन्दै त्यसलाई अघि बढाउन पार्टीले अग्रसर भूमिका खेल्ने दृढता व्यक्त गरिन्। उनले अध्यक्ष प्रचण्डको प्रस्तावमा समर्थन पनि जनाइन्।
बैठकमा भुसालसँगै नेताहरू वर्षमन पुन, हरिबोल गजुरेल, अग्नि सापकोटा, मातृका यादव, राम कार्कीलगायतले आ–आफ्ना धारणा राखेका छन्। उपत्यका विशेष प्रदेश र लुम्बिनी प्रदेशको निष्कर्षमा अध्यक्ष प्रचण्डको प्रतिवेदनलाई पूर्ण समर्थन गरिएको छ। मंसिरमै महाधिवेशन गर्ने र त्यसको मिति तोकेर अघि बढ्नुपर्ने सुझाव पनि प्रस्तुत भएको छ।
बैठकमा अध्यक्ष प्रचण्ड, वरिष्ठ उपाध्यक्ष नारायणकाजी श्रेष्ठ र उपमहासचिव जनार्दन शर्माले आ–आफ्ना प्रस्तावहरू पेस गरेका छन्। प्रचण्डले केन्द्रीय समिति भंग गरी महाधिवेशन आयोजक समिति बनाउने र आगामी मंसिरमा विशेष महाधिवेशन गर्ने प्रस्ताव राखेका छन्।
तर, वरिष्ठ उपाध्यक्ष श्रेष्ठले महाधिवेशनलाई फागुन २१ मा हुने प्रतिनिधि सभा चुनावपछि सार्नुपर्ने धारणा राखेका छन्। त्यस्तै, उपमहासचिव शर्माले नयाँ टिम ल्याएर हालका पदाधिकारीलाई निर्देशक समितिमा रुपान्तरण गर्ने प्रस्ताव गरेका छन्।
तीन वटै प्रस्तावमाथि समूहगत छलफल भइरहेको छ। छलफल सकिएपछि अध्यक्ष प्रचण्डले जवाफ दिने र प्रतिवेदन पारित गरेर बैठक टुंग्याउने तयारी गरिएको प्राधिकरणले जनाएको छ।
