काठमाडौं । जिल्ला प्रहरी कार्यालय सुर्खेतले नक्कली नेपाली नोट र ठूलो परिमाणमा लागूऔषध अफिमसहित पाँच जनालाई पक्राउ गरेको छ। पक्राउ परेका व्यक्तिहरूमध्ये एकजना सञ्चार संस्था सञ्चालन गर्ने सञ्चालक समेत रहेका छन्।
प्रहरीका अनुसार असार ३० गते राति सुर्खेतको वीरेन्द्रनगर नगरपालिका–१०, शान्ति टोलमा खटिएको प्रहरी टोलीले गुप्त सूचनाका आधारमा दिलमाया सिंह ठकुरीलाई रु १,००० दरका ६ थान नक्कली नोटसहित नियन्त्रणमा लिएको थियो। थप अनुसन्धानका क्रममा सोही दिन साँझ दिलमायाको डेरा र रामबहादुर सिंहको बसोबास स्थानबाट रु १,००० दरका १,२३६ थान नक्कली नोट फेला परेको छ, जसको मूल्य रु १२ लाख ३६ हजार बराबर रहेको बताइएको छ।
यससँगै प्रहरीले असार ३१ गते कृष्णबहादुर वली र प्रेमबहादुर बिकलाई पक्राउ गरी उनीहरूको डेराबाट ११ पोका अफिम जस्तो देखिने गिलो पदार्थ फेला पारेको छ, जसको तौल ११ केजी ३७२ ग्राम रहेको छ।
थप अनुसन्धानका क्रममा प्रहरी टोलीले बाँके कोहलपुर नगरपालिका–११ न्युरोडस्थित जनगर्जन नेटवर्क प्रा.लि. नामक मिडिया कार्यालयमा छापा मारी सञ्चालक मनबहादुर सहकारीलाई पक्राउ गरेको छ। छानबिन गर्दा उनको कार्यलय र निवासबाट रु १,००० दरका ५१ थान नक्कली नोट, १९ केजी ३०० ग्राम अफिम जस्तो देखिने पदार्थ, नक्कली नोट बनाउने Canon प्रिन्टर, कम्प्युटर उपकरण, क्यामेरा लगायतका सामग्री बरामद गरिएको प्रहरीको भनाइ छ।
पक्राउ परेका व्यक्तिहरू:
१. दिलमाया सिंह ठकुरी (२२), जाजरकोट, कुशे गाउँपालिका–५
२. रामबहादुर सिंह (३३), कुशे गाउँपालिका–५
३. कृष्णबहादुर वली (३५), भेरीगंगा नगरपालिका–१२, सुर्खेत
४. प्रेमबहादुर बिक (३८)
५. मनबहादुर सहकारी (३४), कोहलपुर, बाँके
प्रहरीका अनुसार घटनामा संलग्नहरूमाथि लागुऔषध तथा जाली नोट कारोबारसम्बन्धी कसुरमा थप अनुसन्धान भइरहेको छ।
