एजेन्सी । मलेसियाले आप्रवासी कामदारमाथि तीव्र गतिमा धरपकड अभियान चलाएको छ। सेलायाङ बारु क्षेत्रबाट मात्रै ८४३ जना आप्रवासीलाई मलेसियन प्रहरीले नियन्त्रणमा लिएको छ।
पक्राउ परेकामध्ये ८०८ जना पुरुष र ३५ जना महिला रहेका छन्। उनीहरूको उमेर २१ देखि ५३ वर्ष बीच रहेको बताइएको छ। पक्राउ परेकामध्ये नेपाली, इन्डोनेसियाली, बंगाली, भारतीय, म्यानमार र पाकिस्तानी नागरिक रहेका छन्। हालसम्म कुन देशका कति नागरिक पक्राउ परेका हुन् भन्ने आधिकारिक विवरण सार्वजनिक गरिएको छैन।
मलेसिया नेपाली श्रमिकहरूको प्रमुख गन्तव्य भएकाले कैयौं नेपालीहरू पनि यसमा समावेश हुने अनुमान गरिएको छ।
मलेसियन प्रहरीले धेरै पक्राउ परेकामध्ये परिचय खुल्ने आधिकारिक कागजात नभएको, भिसा वा पासको शर्त उल्लंघन गरेको, बसाई अवधि नाघेको वा नक्कली/अमान्य कागजात प्रयोग गरेको आरोप लगाएको छ। यस क्रममा व्यापक मात्रामा धरपकड अभियान सञ्चालन भइरहेको छ।
