बुटवल । नेकपा एमालेकी केन्द्रीय सचिव पद्मा अर्यालले पार्टीमा प्रस्तावित ७० वर्षे उमेरहद हटाउने निर्णय कुनै व्यक्तिलक्षित नभई सोचविचारसाथ गरिएको स्पष्ट पार्दै यसबारे अलमलिन नहुने बताएकी छन्।
लुम्बिनी प्रदेश कमिटीद्वारा आयोजित तीन दिने पार्टी सञ्चालन तथा व्यवस्थापनसम्बन्धी प्रशिक्षणको समापन समारोहलाई सम्बोधन गर्दै अर्यालले भनिन्, “७० वर्षे उमेरहद हटाउने प्रस्ताव केन्द्रीय कमिटीबाट पारित भइसकेको छ, अब विधान महाधिवेशनले अन्तिम निर्णय गर्नेछ।”
उनका अनुसार यो प्रस्ताव विशेष उद्देश्य वा व्यक्ति लक्षित होइन, पार्टीको संरचना र अवस्था हेरेर ल्याइएको हो। “यो व्यवस्था पहिले नै निष्क्रिय भइसकेको थियो,” उनले भनिन्।
अर्यालले मुलुकको अभिभावकको भूमिका निर्वाह गरिसकेको व्यक्तिले दलीय राजनीतिमा सक्रिय रहनु उपयुक्त नहुने पार्टीको महसुससहित केन्द्रीय कमिटीले निर्णय गरेको बताइन्।
त्यस्तै उनले पार्टीभित्र अनुशासन र सुशासन कायम राख्न सबै नेताकार्यकर्तालाई सजग रहन आह्वान गरिन्।
फरक प्रसंगमा सचिव अर्यालले एमाले अध्यक्ष केपी शर्मा ओलीको कार्यकालमा भएका महत्त्वपूर्ण उपलब्धिहरूको चर्चा गरिन्।
उनले भनिन्, “प्रधानमन्त्रीको सपथ ग्रहण गर्दा २७ वटा स्वार्थ समूहहरू आन्दोलनमा थिए, ती सबैलाई संवाद र वार्ताबाट व्यवस्थापन गरिएको हो।” साथै, नेपालमा सुरुङमार्ग निर्माण असम्भव मानिएको समयमा ओली नेतृत्वले सम्भव बनाएको उल्लेख गर्दै उनले बीआरआई सम्झौतादेखि आर्थिक सूचक वृद्धिसम्मका विषयलाई उपलब्धिका रूपमा प्रस्तुत गरिन्।
एमालेले विधान महाधिवेशनमा उमेरहदसहित अन्य व्यवस्थाहरूमा व्यापक बहस गरी निर्णय लिने बताइएको छ।
