काठमाडौं। लामो समयदेखि आन्तरिक विवाद, नेतृत्व संघर्ष र पटक–पटकको विभाजनले कमजोर बन्दै आएको गैरआवासीय नेपाली संघ अब सहमतिमार्फत नयाँ चरणमा प्रवेश गरेको छ।
काठमाडौँमा जारी संघको १२ औँ महाधिवेशनबाट डा. हेमराज शर्मा सर्वसम्मत रूपमा अध्यक्ष चयन भएसँगै संगठनभित्रको शक्ति संघर्ष अस्थायी रूपमा भए पनि थामिएको संकेत देखिएको छ।
वेलायतस्थित लिभरपुल विश्वविद्यालय मा कार्यरत डा. शर्मा अध्यक्ष पदका प्रमुख दाबेदार थिए। अध्यक्षका अर्का प्रत्याशी रोबिन शेरचन र रबिन बज्राचार्यले अन्तिम समयमा उम्मेदवारी फिर्ता लिएपछि उनलाई निर्विरोध अध्यक्ष बन्ने बाटो खुलेको हो। निर्वाचन समितिले औपचारिक घोषणा सोमबार गर्ने जनाएको छ।
एनआरएनएको इतिहास हेर्दा यसअघि सात अध्यक्षमध्ये चार जना प्रतिस्पर्धात्मक निर्वाचनबाट आएका थिए भने उपेन्द्र महतो, जीवा लामिछाने र देवमान हिराचन मात्र सर्वसम्मत नेतृत्वका रूपमा चयन भएका थिए। डा. शर्माको चयनसँगै करिब १३ वर्षपछि संघले फेरि सर्वसम्मतिको अभ्यास दोहोर्याएको हो।
महाधिवेशनमा अध्यक्ष मात्र होइन, अन्य पदमा पनि सहमतिको सूत्र खोजिएको छ। अध्यक्षसहित कुल ६९ पदमा सर्वसम्मत नेतृत्व चयन हुने सम्भावना रहेको स्रोतले जनाएको छ। यसले लामो समयदेखि समानान्तर समूह र विवादमा अल्झिएको संघलाई एकीकृत ढाँचामा फर्काउने अपेक्षा गरिएको छ।
संघभित्र पछिल्ला वर्षहरूमा नेतृत्व वैधता, निर्वाचन प्रक्रिया र समूहगत ध्रुवीकरणलाई लिएर विवाद चर्किँदै आएको थियो। त्यस पृष्ठभूमिमा यसपटकको सर्वसम्मति केवल नेतृत्व चयन नभई संस्थागत विश्वास पुनर्स्थापनाको प्रयासका रूपमा पनि हेरिएको छ।
