काठमाडौं । नेपाल प्रिमियर लिग (एनपीएल) सिजन–२ को उपाधि लुम्बिनी लायन्सले जितेको छ। शनिबार भएको फाइनल खेलमा लुम्बिनीले सुदूरपश्चिम रोयल्सलाई हराउँदै च्याम्पियन बनेको हो।
प्रतियोगिताकै सर्वोत्कृष्ट नेपाली खेलाडी लुम्बिनी लायन्सका कप्तान रोहित पौडेल घोषित भएका छन्। रोहितले प्रतियोगिताभर २७६ रन बनाएका साथै १० विकेट लिएका थिए। उनलाई पुरस्कारस्वरूप ओमोडा कार प्रदान गरिएको छ। रोहित प्रतियोगिताको उत्कृष्ट ब्याटर पनि घोषित भए र यसका लागि पल्सर बाइक प्राप्त गरे।
रेड बुल इनर्जेटिक प्लेयर अफ द टुर्नामेन्ट सुदूरपश्चिम रोयल्सका अविनाश बोहरा घोषित भए। उनले १७ विकेट लिएर संयुक्त रूपमा सर्वाधिक विकेट टेकर बने।
प्रतियोगिताको सर्वोत्कृष्ट खेलाडी (प्लेयर अफ द टुर्नामेन्ट) रुबेन ट्रम्पलमन घोषित भए। नामिबियन पेस बलर रुबेनले १५ विकेट लिए र पुरस्कारस्वरूप ५ लाख रुपैयाँ प्राप्त गरे। उनी फाइनलको प्लेयर अफ द म्याच पनि घोषित भए।
प्रतियोगिताको सर्वोत्कृष्ट बलर विराटनगर किंग्सका सन्दीप लामिछाने घोषित भए र उनलाई पनि पल्सर बाइक प्रदान गरियो। लुम्बिनी लायन्सका तिलकराज भण्डारी इनर्जेटिक प्लेयर अफ द टुर्नामेन्ट घोषित भए भने श्रेष्ठ इमर्जिङ खेलाडीको अवार्ड शेर मल्लले जिते। शेर मल्लले पनि पल्सर बाइक प्राप्त गरे।
यसरी लुम्बिनी लायन्सले व्यक्तिगत र टोलीगत उत्कृष्ट प्रदर्शनसहित एनपीएल सिजन–२ को उपाधि आफ्नो नाममा लेखाउन सफल भयो।
