काठमाडौं । नेपाल क्रिकेट संघ (क्यान) ले नेपाल प्रीमियर लिग (एनपीएल) सिजन–२ बाट टिकट बिक्रीमार्फत झण्डै १२ करोड रुपैयाँ उठाउने लक्ष्य सार्वजनिक गरेको छ। शनिबार पत्रकार सम्मेलनमार्फत क्यानले आगामी मंसिर १ गतेदेखि सुरु हुने प्रतियोगिताको सम्पूर्ण तयारी पूरा भएको जानकारी दिएको हो।
यसपटकको एनपीएल पहिलोपटक फ्लडलाइटमा आयोजना हुन लागेको छ। क्यानका अनुसार उद्घाटन खेलका लागि टिकट मूल्य १,००० र १,५०० रुपैयाँ तोकिएको छ। त्यस्तै, प्लेअफ र फाइनल खेलका टिकट १,००० र २,००० रुपैयाँ रहनेछन्। सामान्य खेल दिनमा पाँच सय र एक हजार रुपैयाँ टिकट मूल्य निर्धारण गरिएको छ।
क्यानले दोस्रो संस्करणबाट कुल ३५ करोडभन्दा बढी आम्दानी हुने अनुमान गरेको छ। संघका अनुसार हालसम्म १५ करोड ३० लाख प्रायोजकबाट, नौ करोड सहभागी टिमहरूबाट र ओटिटी आम्दानीबाट पाँच करोड ३० लाख कटाएपछि बाँकी रकम प्राप्त भएको छ। कुल आम्दानीमा टिकट बिक्रीले ८ देखि १२ करोड रुपैयाँ योगदान गर्ने अपेक्षा क्यानले गरेको छ।
एनपीएल सिजन–२ को उद्घाटन खेल मंसिर १ गते जनकपुर बोल्ट्स र काठमाडौं गोर्खाजबीच हुनेछ। खेल अपराह्न ४ बजेदेखि सुरु हुने छ।
