काठमाडौं । सरकारले आगामी फागुन २१ गतेका लागि तय भएको प्रतिनिधिसभा निर्वाचनमा विदेशमा रहेका नागरिकले पनि मतदान गर्न सकून् भन्ने उद्देश्यले कानुनी बाधा हटाउने तयारी सुरु गरेको छ।
गृहमन्त्री ओमप्रकाश अर्यालले कार्यवहक प्रमुख निर्वाचन आयुक्त रामप्रसाद भण्डारीसँग छलफल गरी विदेशमा रहेका नागरिकको मताधिकार सुनिश्चित गर्नेबारे काम अघि बढाउने बताएका छन्। भण्डारीका अनुसार, ‘पुरानो ऐन नियमले थोरै छेक्छ, ऐन नियमको बाधा कसरी हटाउने भन्नेबारे छलफल भइरहेको छ।’
मन्त्री अर्यालले कम्तीमा समानुपातिकतर्फ मतदानको अधिकार सुनिश्चित गर्ने गरी कानुनी व्यवस्था अघि बढाइने बताए। ‘सर्वोच्च अदालतले यसबारे आदेश गरिसकेको छ। आयोगले बाधा पहिचान गरी सरकारले आवश्यक ऐन बनाएर अघि बढाउनेछ,’ उनले भने।
सरकार सम्बन्धित देशका राजदूतावासमार्फत मतदानको व्यवस्था मिलाउने योजना बनाइरहेको छ। भदौ २३–२४ गतेको जेनजी आन्दोलनपछि तत्कालीन सरकारले ढलेर सुशीला कार्की नेतृत्वको अन्तरिम सरकार गठन भएको थियो र फागुन २१ मा निर्वाचन गराउने म्यान्डेट पाएको छ।
प्रतिनिधिसभा विघटन भइसकेकोले सरकारले आवश्यक कानुनहरू अध्यादेशमार्फत ल्याउने तयारी पनि गरेको छ।
