काठमाडौं। नेपाल उद्योग वाणिज्य महासंघ को पर्यटन तथा हवाई यातायात समितिका सभापति देशबन्धु बस्नेतले नेपालको पर्यटन क्षेत्रमा हालसम्म भएका उपलब्धिमा निजी क्षेत्रको सबैभन्दा ठूलो योगदान रहेको बताएका छन्।
महासंघको कार्यकारिणी समितिको सदस्यका रूपमा आफ्नो तीनवर्षे कार्यकाल सकिन लाग्दा बस्नेतले पर्यटन तथा हवाई यातायात समितिको सभापतिको जिम्मेवारी सम्हालेर सरकार तथा मातहतका निकायसँग निरन्तर छलफल गर्दै फलदायी पहल गरेको बताए।
बस्नेतका अनुसार आफ्नो कार्यकालमा नेपालको पर्यटन क्षेत्रले भोगिरहेका समस्याका समाधानका लागि प्रधानमन्त्री तथा मन्त्रिपरिषद्को कार्यालय, सम्बन्धित मन्त्रालय, विभाग तथा मातहतका निकायहरूसँग पटक–पटक छलफल गरिएको थियो। त्यसबाट केही आशावादी परिणाम देखिएको उनको भनाइ छ।
उनले पोखरा अन्तर्राष्ट्रिय विमानस्थल र गौतम बुद्ध अन्तर्राष्ट्रिय विमानस्थल पूर्ण क्षमतामा सञ्चालन हुनुपर्ने विषय निरन्तर उठाइएको बताए। सरकारबाट अन्तर्राष्ट्रिय उडान गर्ने एयरलाइन्सलाई छुट सुविधा दिने योजना ल्याइए पनि ती दुवै विमानस्थल अझै पूर्ण रूपमा उपयोग हुन नसकेको उनको टिप्पणी छ।
बस्नेतले भने, ‘अब नयाँ सरकारले यी दुवै अन्तर्राष्ट्रिय विमानस्थलको पूर्ण क्षमतामा सञ्चालनका लागि कूटनीतिक पहल बढाउनेमा हामी आशावादी छौँ।’
उनका अनुसार पर्यटन ऐन संशोधन, होटललाई उद्योगसरह सुविधा दिने व्यवस्था, हवाई टिकटमा लगाइएको भ्याटसम्बन्धी प्रावधान पुनरावलोकन जस्ता विषयमा पनि समितिले सरकारसँग निरन्तर आवाज उठाएको थियो। यसकै परिणामस्वरूप अघिल्लो सरकारले होटल व्यवसायलाई उद्योगसरह मान्यता दिने निर्णय गरेको थियो। तर उक्त निर्णयको व्यवहारिक कार्यान्वयन अझै आवश्यक रहेको बस्नेतले बताए।
उनले नेपाललाई युरोपेली मुलुकसँग सिधा हवाई सम्पर्कमा जोड्नुपर्ने आवश्यकता औंल्याउँदै नेपाली आकाशलाई युरोपेली संघ को कालोसूचीबाट हटाउन नेपाल नागरिक उड्डयन प्राधिकरण सहित सरकारको सार्थक पहल आवश्यक रहेको बताए।
बस्नेतले नेपाल पर्यटन बोर्ड मार्फत विश्व बजारमा नेपालको ब्रान्डिङ प्रभावकारी रूपमा गर्नुपर्ने र त्यसमा निजी क्षेत्रको सक्रिय सहभागिता अपरिहार्य रहेको धारणा राखे।
आफ्नो कार्यकालमा सहयोग गर्ने उपसभापति अच्युत शर्मा गुरागाईं, निलहरी बाँस्तोला, सदस्यहरू तथा सल्लाहकारहरूलाई उनले धन्यवाद दिएका छन्। साथै आगामी दिनमा पनि नेपालको निजी क्षेत्रको विकास र विस्तारका लागि निरन्तर प्रयत्न जारी राख्ने प्रतिबद्धता व्यक्त गरेका छन्।
