प्रधानमन्त्री राहत कोषमा पौने १२ अर्ब मौज्दात, भोटेकोशी बाढीपछि ७ अर्ब ६८ करोड संकलन
काठमाडौं । प्रधानमन्त्री दैवी प्रकोप राहत कोषमा कुल ११ अर्ब ९५ करोड १७ लाख रुपैयाँ मौज्दात रहेको छ।
कोषका नौवटा रुपैयाँ खातामा ८ अर्ब ७६ करोड ६९ लाख रुपैयाँ र दुईवटा डलर खातामा २ करोड ११ लाख ८ हजार ४७१ अमेरिकी डलर मौज्दात रहेको हो।
डलर खातामा रहेको रकमलाई प्रतिडलर १५० रुपैयाँ ८८ पैसाका दरले रूपान्तरण गर्दा कोषमा उपलब्ध कुल मौज्दात ११ अर्ब ९५ करोड १७ लाख रुपैयाँ पुगेको हो।
यसैबीच, रसुवा–भोटेकोशी बाढीपछि मात्रै कोषमा ७ अर्ब ६८ करोड ४४ लाख रुपैयाँ र २ करोड ५ लाख २२ हजार ४२३ अमेरिकी डलर संकलन भएको छ। यो रकम विपद्अघिको कोषमा रहेको २ अर्ब ८ करोड २४ लाख रुपैयाँ मौज्दातबाहेकको हो।
भदौ २३ गते मात्रै कोषमा ३० करोड ६२ लाख रुपैयाँ र १ लाख १२ हजार ३२ अमेरिकी डलर सहयोग प्राप्त भएको छ। बाढी तथा पहिरोबाट ठूलो जनधनको क्षति भएपछि निजी क्षेत्र, संघसंस्था तथा विभिन्न व्यक्तिबाट कोषमा सहयोग आउने क्रम जारी छ।
सरकारले राहत तथा उद्धारका लागि कोषबाट भदौ १६ गते राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई १ अर्ब रुपैयाँ हस्तान्तरण गरिसकेको छ।
रसुवा–भोटेकोशी बाढीपछि संकलित ठूलो रकमसँगै कोषमा मौज्दातसमेत बढेको छ। सरकारले यही कोषमार्फत विपद् प्रभावितको तत्कालीन राहत, उद्धार तथा पुनर्स्थापनाका लागि आवश्यक रकम परिचालन गर्दै आएको छ।
