काठमाडौं। नेपाल राष्ट्र बैंकले विदेशबाट नगद विदेशी मुद्रा नेपाल भित्र्याउँदा वा नेपालबाट बाहिर लैजाँदा लागू हुने व्यवस्थाबारे पुनः सूचना जारी गर्दै अमेरिकी डलर ५ हजारभन्दा बढी नगद ल्याउँदा अनिवार्य रूपमा भन्सार घोषणा गर्नुपर्ने व्यवस्था दोहोर्याएको छ।
विदेशी मुद्रा व्यवस्थापन विभागले बिहीबार सूचना जारी गर्दै नेपाली तथा विदेशी नागरिकले अमेरिकी डलर ५ हजारसम्म (वा सो बराबरको अन्य विदेशी मुद्रा) बिना भन्सार घोषणा नेपाल ल्याउन सक्ने, तर त्यसभन्दा बढी रकम ल्याउँदा भने भन्सारमा घोषणा गरी प्रमाणित गराउनुपर्ने जनाएको छ।
राष्ट्र बैंकले विदेशी विनिमय (नियमित गर्ने) ऐन, २०१९ र सम्पत्ति शुद्धीकरण (मनी लाउन्डरिङ) निवारण ऐन, २०६४ अन्तर्गतको व्यवस्थाका आधारमा यसअघि जारी गरिएका सूचनालाई पुनः प्रकाशन गर्दै सर्वसाधारणलाई प्रचलित कानुनी व्यवस्था पालना गर्न आग्रह गरेको हो।
सूचनामा भारतीय मुद्रासम्बन्धी व्यवस्था पनि स्पष्ट पारिएको छ। सन् २०१६ नोभेम्बर ९ अघि चलनचल्तीमा रहेका भारु ५०० र १००० दरका नोटको कारोबार पूर्ण रूपमा निषेध रहेको राष्ट्र बैंकले स्मरण गराएको छ।
यस्तै, सन् २०१६ नोभेम्बर ९ पछि जारी भएका भारु २०० र ५०० दरका नोट नेपाली वा भारतीय नागरिकले प्रतिव्यक्ति अधिकतम २५ हजार भारतीय रुपैयाँसम्म नेपाल–भारतबीच ल्याउन, लैजान तथा सटही गर्न सक्ने व्यवस्था यथावत् रहेको उल्लेख गरिएको छ।
राष्ट्र बैंकले नेपाली नागरिकले भारतबाहेक अन्य कुनै देशमा भारतीय रुपैयाँ लैजान वा अन्य देशबाट भारतीय रुपैयाँ नेपाल ल्याउन नपाउने व्यवस्था पनि पुनः स्मरण गराएको छ।
यसैसँगै राष्ट्र बैंकले यही विषयमा २०८२ भदौ १० गते प्रकाशित सूचना खारेज गरिएको जनाएको छ।
