काठमाडौं । नेपाली कांग्रेसको विद्यार्थी संगठन नेपाल विद्यार्थी संघ (नेविसंघ) को अधिवेशन पक्षधरहरूले सोमबार पार्टीको केन्द्रीय कार्यालय सानेपामा प्रदर्शन गरेका छन्।
प्रदर्शनमा सहभागी विद्यार्थी नेताहरूले लामो समयदेखि अधिवेशन नगरी संगठनलाई निष्क्रिय बनाइएको भन्दै विरोध जनाएका हुन्। उनीहरूले ‘म म्यादि नेविसंघ, मेरो अधिवेशन कहिले?’, ‘९ वर्षसम्म अधिवेशन नगराउने लोकतान्त्रिक पार्टीको नेविसंघ’, ‘म मेरो पार्टीले बन्धक बनाएको नेविसंघ’ लगायतका प्लेकार्ड बोकेर प्रदर्शन गरे।
प्रदर्शनकारीहरू कालो कपडाले शरीर र मुख छोपेर उपस्थित भएका थिए। उनीहरूले मातृ पार्टी नेपाली कांग्रेसले संगठनको जिम्मेवारी पूरा गर्न नसकेको भन्दै हालको नेविसंघ नेतृत्वलाई हटाएर विधानअनुसार नयाँ कार्यसमिति गठन गर्न माग गरेका छन्।
पार्टी सभापति र पदाधिकारीहरूले ‘नर्सरी मासेर बगैँचा बनाउँछौं’ भन्ने खोक्रा भाषण गर्ने मात्र काम गरेको भन्दै उनीहरूले अधिवेशनको कुनै तयारी नभएको अवस्थामा नेतृत्वको म्याद थप्न नहुने जिकिर गरे। विरोध प्रदर्शन शान्तिपूर्ण तर आक्रोशपूर्ण रुपमा सम्पन्न भएको थियो।
