चितवन । लगातारको वर्षासँगै मुग्लिन–नारायणगढ सडक खण्डमा ढुंगा खसिरहँदा सवारी आवागमन दुईतर्फी बन्द भएको छ।
रोड डिभिजन भरतपुरका अनुसार शनिबार दिउँसो करिब ४ बजे तुईन खोला नजिकै माथिबाट लगातार ढुंगा खसिरहेका कारण सडक अवरुद्ध भएको हो। ढुंगा झर्ने क्रम नरोकिएकाले पहिरो पन्छाउने कार्य कठिन बनेको र अहिलेसम्म बाटो खुलाउने प्रयास सफल हुन नसकेको जानकारी दिइएको छ।
अविरल वर्षाका कारण सो सडक खण्डमा पहिरोको उच्च जोखिम कायम रहेको भन्दै अत्यावश्यक अवस्था बाहेक यात्रा नगर्न यात्रुहरूलाई आग्रह गरिएको छ। यात्रामा जानै परेमा सम्बन्धित सुरक्षा निकायसँग समन्वय गर्न पनि अनुरोध गरिएको छ।
सुरक्षाको दृष्टिकोणले हाल प्रहरीले सवारीसाधनहरूलाई विभिन्न स्थानमा होल्ड गरेर राखेको र परिस्थितिअनुसार मात्रै सञ्चालनमा ल्याइने रोड डिभिजनले जनाएको छ।
