काठमाडौं । देशका विभिन्न स्थानमा वर्षा हुने क्रम जारी छ। यस क्रममा आज दिउँसो पनि पानी पर्ने क्रम जारी रहने मौसम पूर्वानुमान महाशाखाले जनाएको छ।
महाशाखाका अनुसार दिउँसो पहाड र तराईका थोरै स्थानमा मध्यम वर्षा हुने सम्भावना छ।
यस क्रममा कोसी प्रदेश, गण्डकी प्रदेश र सुदूरपश्चिम प्रदेशका पहाड भेगका एक-दुई स्थानमा भारी वर्षाको पनि सम्भावना छ।
वर्षाका कारण बाढी-पहिरो जाने सम्भावना रहेकाले सतर्कता अपनाउन मौसम महाशाखाले सम्बन्धित क्षेत्रका बासिन्दालाई सुझाव दिएको छ।
मौसम महाशाखाले जारी गरेको २४ घण्टे बुलेटिन यस्तो छ:
आज दिउँसो : देशभर साधारणतया बदली (आकाशभरि बादल) रहनेछ। देशका पहाड भूभागका केही स्थान र तराई भूभागका थोरै स्थानमा मध्यम वर्षाको सम्भावना छ। कोसी प्रदेश, गण्डकी प्रदेश र सुदूरपश्चिम प्रदेशका पहाड भूभागका एक-दुई स्थानमा भारी वर्षाको सम्भावना छ।
आज राति : देशभर साधारणतया बदली रहनेछ। कोसी प्रदेश,गण्डकी प्रदेश र सुदूरपश्चिम प्रदेशलगायत देशका बाँकी पहाड भूभागका केही स्थान तथा बाँकी भूभागका थोरै स्थानमा मध्यम वर्षाको सम्भावना छ। कोसी प्रदेश र सुदूरपश्चिम प्रदेशको पहाड भूभागका एक-दुई स्थानमा भारी वर्षाको सम्भावना छ।
हाल मनसुनको न्यूनचापीय रेखा पूर्वमा सरदर स्थानभन्दा दक्षिणतर्फ तथा पश्चिममा सरदर स्थानआसपास छ।
