काठमाडौं । मौसम पूर्वानुमान महाशाखाले आज (बिहीबार) दिउँसो र राति देशका विभिन्न भागमा वर्षा हुने सम्भावना रहेको जनाएको छ।
महाशाखाले बिहीबार बिहान ६ बजे जारी गरेको २४ घण्टे मौसम बुलेटिनअनुसार दिउँसो देशका पहाडी भूभागमा सामान्यतया बदली रही तराईसहितका केही स्थानमा आंशिक बदली रहनेछ। यस अवधिमा पहाडका थोरै स्थान र तराईका एक–दुई स्थानमा मध्यम वर्षा हुने अनुमान गरिएको छ।
आज राति देशभर सामान्यतया बदली रहने पूर्वानुमान गरिएको छ। कोसी, मधेस, बागमती र गण्डकी प्रदेशका केही स्थानमा मध्यम वर्षा हुने सम्भावना छ भने बाँकी प्रदेशका थोरै ठाउँमा समेत वर्षा हुनसक्ने महाशाखाले जनाएको छ। त्यस्तै, कोसी, बागमती र गण्डकी प्रदेशका पहाडी भूभागका एक–दुई स्थानमा भारी वर्षा हुने सम्भावना रहेको छ।
महाशाखाले दिउँसो भन्नाले बिहानदेखि साँझ ६ बजेसम्म र राति भन्नाले साँझ ६ बजेदेखि भोलिपल्ट बिहान ६ बजेसम्मको अवधिलाई जनाइएको स्पष्ट पारेको छ।
मौसमविद्हरूका अनुसार २४ घण्टामा १० मिलिमिटरसम्म पानी पर्नुलाई हल्का वर्षा, १० देखि ५० मिलिमिटरलाई मध्यम वर्षा, ५० देखि १०० मिलिमिटरलाई भारी वर्षा, १०० देखि २०० मिलिमिटरलाई धेरै भारी वर्षा र २०० मिलिमिटरभन्दा बढीलाई अति भारी वर्षा मानिन्छ।
यस्तै, पूर्वानुमानको भाषामा “एक–दुई स्थानमा वर्षा” भन्नाले प्रदेशको १० प्रतिशतभन्दा कम क्षेत्रमा वर्षा हुने सम्भावना देखिनु हो। १०–३० प्रतिशत क्षेत्रलाई ‘थोरै स्थान’, ३०–५० प्रतिशतलाई ‘केही स्थान’, ५०–८० प्रतिशतलाई ‘धेरै स्थान’ र ८० प्रतिशतभन्दा बढी क्षेत्रलाई ‘अधिकांश स्थान’ भनिने गरिएको छ।
