काठमाडौं । नेकपा माओवादी केन्द्रको दुई दिन चलेको केन्द्रीय समिति बैठक शुक्रबार सकिएको छ। जेन–जी आन्दोलनपछि विकसित घटनाक्रमबारे निर्णय लिन अध्यक्ष पुष्पकमल दाहालले केन्द्रीय समिति बैठक बोलाएका थिए। बैठकमा मंसिरमा विशेष महाधिवेशन गर्ने मुख्य एजेन्डा अघि सारेका थिए। सँगै पार्टीका अन्य नेता कार्यकर्ताहरूले अध्यक्ष दाहालले नेतृत्व छाड्नुपर्ने दबाब पनि दिन थालेका थिए।
यही पृष्ठभूमिमा बसेको केन्द्रीय समिति बैठकले विभिन्न ६ वटा निर्णय गरेको छ। पहिलो निर्णयमा पार्टीका सबै समिति भंग गरेर अध्यक्ष दाहालको संयोजकत्वमा महाधिवेशन आयोजक समितिमा रूपान्तरण हुने, पदाधिकारी नै आयोजक समितिको सचिवालयमा रूपान्तरण गर्ने र महाधिवेशन आगामी मंसिरमा गर्ने छ।
यस्तै दोस्रोमा पार्टीभित्रका नेता–कार्यकर्ताको सम्पत्ति छानबिन गर्न शक्तिशाली आयोग गठन गर्ने, तेस्रोमा नेपोटिजम(परिवारवाद)को आरोप माओवादीमाथि पनि रहेकोले कार्यविधि बनाएर पारिवारिक सदस्यहरूका बारेमा निर्णय लिने । संस्कार, कार्यशैली र चालचलन सम्बन्धी नीति बनाउन, चौथो निर्णयमा जेन–जीलाई पार्टीका सबै कमिटीमा अधिकतम सहभागी गर्ने । युवाहरूलाई प्राथमिकता दिने, पाँचौँमा आइटीका कामलाई उच्च प्राथमिकतामा राखेर काम गर्ने र छैटौँ निर्णयमा अध्यक्ष दाहालका प्रस्ताव परिमार्जनसहित पारित, वरिष्ठ उपाध्यक्ष नारायणकाजी श्रेष्ठ र उपमहासचिव जनार्दन शर्मालेले राखेको प्रस्तावलाई समेत समेट्ने । महाधिवेशनसम्म छलफल गर्दै जाने निर्णय गरेको छ।
१. केन्द्रीय समिति अध्यक्ष पुष्पकमल दाहाल ‘प्रचण्ड’को संयोजकत्वमा महाधिवेशन आयोजक समितिमा र पदाधिकारी आयोजक समितिको सचिवालयमा रूपान्तरण। महाधिवेशन आगामी मंसिरमा गर्ने ।
२. पार्टीभित्रका नेता-कार्यकर्ताको सम्पत्ति छानबिन गर्न शक्तिशाली आयोग गठन गर्ने ।
३. नेपोटिज्मबारे कार्यविधि बनाएर नेताका पारिवारिक सदस्यहरूका बारेमा निर्णय लिने । संस्कार, कार्यशैली र चालचलनसम्बन्धी नीति बनाउने ।
४. जेन-जीलाई पार्टीका सबै कमिटीमा अधिकतम सहभागी गर्ने । युवाहरूलाई प्रथामिकता दिने ।
५. आईटीको कामलाई उच्च प्राथामिकतामा राख्ने।
६. अध्यक्ष प्रचण्डको प्रस्ताव पारित, वरिष्ठ उपाध्यक्ष र उपमहासचिवले राखेको प्रस्तावलाई त्यसमै समेट्ने । महाधिवेशनसम्म छलफल गर्दै जाने ।
७. विचार मिल्ने विभिन्न पार्टीसँग एकता गर्ने
