काठमाडौं । शिक्षा, विज्ञान तथा प्रविधिमन्त्री महावीर पुनले मुलुकभरका सामुदायिक विद्यालयमा अनिवार्य रूपमा कम्प्युटर शिक्षक दरबन्दी थप्न निर्देशन दिएका छन् । मंगलबार मन्त्रालयमा आयोजित कार्यक्रममा उनले तुरुन्तै अगाडि बढाउनुपर्ने तीनवटा निर्देशन जारी गरेका हुन् ।
मन्त्री पुनका अनुसार विद्यार्थीहरू कम्प्युटर शिक्षा बाट बञ्चित हुन नदिन सामुदायिक विद्यालयमा कम्तीमा एकजना कम्प्युटर शिक्षक अनिवार्य दरबन्दीमा राखिनेछ । उनले यसलाई प्रमुख प्राथमिकतामा राख्दै मन्त्रालयलाई आवश्यक प्रक्रिया अघि बढाउन निर्देशन दिएका हुन् ।
यस्तै, उनले केही विश्वविद्यालयहरूले परीक्षा लिएर नतिजा प्रकाशन गर्न आठ महिना देखि एक वर्षसम्म लगाउने गरेको विषयमा असन्तुष्टि व्यक्त गरे । मन्त्री पुनले यस्तो ढिलाइका कारण विद्यार्थीहरूलाई अपूरणीय क्षति पुग्ने भन्दै आगामी दिनमा परीक्षा लिएपछि बढीमा तीन महिनाभित्रै नतिजा प्रकाशित गर्न विश्वविद्यालयलाई निर्देशन दिएका हुन् ।
“राष्ट्रिय परीक्षा बोर्डले १२ कक्षाका पाँच लाख विद्यार्थीको नतिजा तीन महिनामै निकाल्न सक्छ भने विश्वविद्यालयहरूले किन सक्दैनन्?” मन्त्री पुनले प्रश्न गर्दै समयसीमाभित्र नतिजा प्रकाशित नगर्ने विश्वविद्यालयहरूको अनुदान रोक्का गरिने चेतावनी दिएका छन् ।
त्यसैगरी, मन्त्री पुनले त्रिभुवन विश्वविद्यालय कीर्तिपुरको प्राङ्गण सफाइ गरी वातावरणलाई आकर्षक बनाउन पनि निर्देशन दिएका छन् । उनले विश्वविद्यालय परिसरभित्र रहेका रुख नकाटी झाडी फाँडेर सुन्दर बगैंचासहितको आकर्षक फुटपाथ बनाउनुपर्ने बताए ।
मन्त्री पुनका निर्देशनले शिक्षा क्षेत्रमा डिजिटल सीप विस्तार, विश्वविद्यालयको समयमै नतिजा प्रकाशन, र क्याम्पस वातावरणलाई व्यवस्थित बनाउन टेवा पुग्ने अपेक्षा गरिएको छ ।
