काठमाडौं । लुम्बिनी लायन्सले विराटनगर किंग्सविरुद्ध ४० रनको जित निकाल्दै नेपाल प्रिमियर लिग (एनपीएल) २०८२ को दोस्रो संस्करणको फाइनलमा प्रवेश गरेको छ। पहिलो पटक फाइनलमा पुगेको लुम्बिनीले उपाधिका लागि साविक उपविजेता सुदूरपश्चिम रोयल्ससँग प्रतिस्पर्धा गर्नेछ। सुदूरपश्चिमले पनि पहिलो क्वालिफायरमा विराटनगरलाई हराउँदै फाइनल यात्रा तय गरेको थियो।
त्रिवि क्रिकेट मैदानमा बिहीबार सम्पन्न दोस्रो क्वालिफायरमा लुम्बिनीले प्रस्तुत गरेको १३५ रनको लक्ष्य पछ्याएको विराटनगर १७.५ ओभरमा ९४ रनमै समेटियो। विराटनगरका लागि साम हिजलेटले ३४, नरेन भट्टले २१ र मर्सान्ट डी लाङ्गले १७ रन बनाए।
लुम्बिनीका लागि तिलक भण्डारीले ३, जेजे स्मिथ, अभिषेश गौतम र रुबेन ट्रम्पलम्यानले दुई–दुई, तथा शेर मल्लले एक विकेट लिए।
अघिल्लो खेलमा टस हारेर ब्याटिङ गरेको लुम्बिनीले निर्धारित २० ओभरमा ८ विकेट गुमाउँदै १३४ रन बनाएको थियो। लुम्बिनीका लागि डार्शी शर्टले ४५, कप्तान रोहितकुमार पौडेलले ३४, निरोशन डिकवेलाले २९ र रुबेन ट्रम्पलम्यानले अविजित ११ रन बनाए। विराटनगरका लागि सुवाश भण्डारी र प्रतिस जिसीले तीन–तीन तथा कप्तान सन्दीप लामिछानेले दुई विकेट लिए।
यस जितसँगै लुम्बिनी लायन्स पहिलोपटक एनपीएल फाइनलमा प्रवेश गरेको छ र क्रिकेटप्रेमीहरूलाई रोमाञ्चक फाइनलको प्रत्याशा बढाएको छ।
