काठमाडौं । लुम्बिनी लायन्सले काठमाडौं गोर्खाजलाई पराजित गर्दै नेपाल प्रिमियर लिग (एनपीएल) को दोस्रो क्वालिफायरमा स्थान बनाएको छ। बुधबार भएको एलिमिनेटर खेलमा काठमाडौँले दिएको ११२ रनको लक्ष्य लुम्बिनीले १७.४ ओभरमा ६ विकेटको क्षतिमा पुरा गर्यो।
अघिल्लो सिजन प्लेअफ दौडबाटै बाहिरिएको काठमाडौँ यस पटक तेस्रो स्थानमा रहँदै एलिमिनेटर खेल्न पुगेको थियो। तर, लुम्बिनीविरुद्ध काठमाडौँका ब्याट्सम्यान लामो समय क्रिजमा टिक्न सकेनन्। टस जितेर ब्याटिङ गर्ने निर्णय पनि आजको खेलमा सफल हुन सकेन।
काठमाडौंले दोस्रो इनिङ्समा उत्कृष्ट फिल्डिङ पनि देखाउन सकेन, जसका कारण लुम्बिनीले सहजै रन बनाउँदै खेललाई आफ्नो पक्षमा राख्यो। पावर प्लेमा ६ विकेट गुमाएपछि दबाबमा आएको काठमाडौंले त्यसपछि कुनै ठूलो पुनरागमन गर्न सकेन।
काठमाडौंका सन्तोष यादवले सर्वाधिक २३ रन बनाए पनि रनआउट भएपछि टीमको इनिङ्स सम्हाल्न सकेनन्। लगातार विकेट पतनका कारण काठमाडौँ एलिमिनेटरबाट बाहिरिन बाध्य भयो। लुम्बिनी लायन्सले लगातार उत्कृष्ट प्रदर्शन गर्दै दोस्रो क्वालिफायरसम्मको यात्रा तय गर्न सफल भएको छ।
