काठमाडौं । नेपाल विद्युत् प्राधिकरण चनौली वितरण केन्द्रले भोलि (साउन ११ गते) देखि लागू हुनेगरी दैनिक ६ घण्टासम्मको लोडसेडिङ तालिका सार्वजनिक गरेको छ। अत्यधिक गर्मी, रोपाईंको सिजन, तथा आकाशे पानी नपरेकाले सिँचाइ प्रयोजनमा विद्युत् खपत बढेपछि लोड व्यवस्थापन गर्न लोडसेडिङ आवश्यक भएको केन्द्रले जनाएको छ।
लोडसेडिङ वितरण केन्द्र अन्तर्गतका नारायणी–माडी, मेघौली–विजयनगर–शुक्रनगर र जगतपुर–रामपुर फिडरहरूमा हुने भएको छ। केन्द्रका अनुसार हाल भरतपुर १३२/३३ केभी सबस्टेशनबाट आउने ३३ केभी डग कन्डक्टर तारमा ३०० एम्पिएरसम्मको विद्युत् मात्रै सुरक्षित रूपमा प्रवाह गर्न मिल्ने क्षमतामा रहेको छ। तर हाल विद्युत् माग अत्यधिक बढ्दा उक्त तारमा ४५० एम्पिएरसम्मको प्रवाह हुँदा प्रणालीमा अवरोध देखिएको हो।
समस्या दीर्घकालीन रूपमा समाधान गर्न अघिल्लो आर्थिक वर्षदेखि नै बसेनी सबस्टेशनबाट विद्युत् आपूर्ति गर्न नयाँ ३३ केभी प्रसारण लाइनको निर्माण कार्य अघि बढाइएको समेत वितरण केन्द्रले जनाएको छ।
कहाँ कतिबेला लोडसेडिङ ?
१. नारायणी-माडी फिडरहरू : बिहान ६:०० देखि ९:०० र दिउँसो ३:०० देखि ६:०० बजेसम्म ।
२. मेघौली-विजयनगर–शुक्रनगर फिडरहरू : बिहान ९:०० देखि १२:०० र बेलुका ६:०० देखि ९:०० बजेसम्म ।
३. जगतपुर-रामपुर फिडरहरू : दिउँसो १२:०० देखि ३:०० र बेलुका ९:०० देखि १२:०० बजेसम्म ।
