भक्तपुर । नेकपा एमालेका अध्यक्ष केपी शर्मा ओलीले अहिलेको सरकार संविधानविपरीत र बलमिच्याइँका आधारमा बनेको आरोप लगाएका छन्।
भक्तपुरमा आयोजित कार्यक्रममा बोल्दै ओलीले सुशीला कार्की नेतृत्वको सरकार संविधानअनुसार गठन नभएको दाबी गरे। उनले भने, “अहिलाका प्रधानमन्त्रीले प्रधानमन्त्री बन्नका लागि शर्त राख्नुभयो — संसद् विघटन भएमात्रै बन्छु, नत्र देशमा जेन-जीले आगो बाल्छन्। लोकतन्त्रको जग भत्काउने शर्तमा प्रधानमन्त्री हुनुभयो।”
ओलीले संविधानभन्दा बाहिर गएर प्रधानमन्त्री बन्नका लागि कार्कीले फागुन २३ र २४ गते सडकमा आन्दोलन गरेको आरोप लगाए। उनका अनुसार, राष्ट्रपतिले फागुन २१ गते नै चुनाव तोकिदिएका थिए, तर त्यसपछि पनि असंवैधानिक रूपमा सरकार गठन गरिएको हो।
“यो सरकार नेपाली जनताको होइन,” ओलीले भने, “अरू कसको हो भन्ने थाहा छैन, तर उनीहरू एउटा खास उद्देश्यका लागि काम गरिरहेका छन्।” उनले सरकारले पासपोर्ट रोक्ने, काठमाडौं छोड्न नपाउनेजस्ता निर्णय लिन खोजेको भन्दै त्यसलाई “सडक तमासा” को संज्ञा दिए।
त्यस क्रममा ओलीले सुशीला कार्कीको डरले आफू नभाग्ने पनि स्पष्ट पारे। अहिलेका गृहमन्त्रीको नाम आफूले गृहमन्त्री भएपछि मात्रै सुनेको भन्दै उनले चेतावनीस्वरूप भने, “गृहमन्त्री बाबुलाई म धेरै नउत्ताउलिन, नचम्किन सल्लाह दिन चाहन्छु। राजनीति र देश चलाउने कुरा ख्यालठट्टा होइन, बुझेर चल्न सुझाव दिन्छु।”
ओलीको भनाइमा अहिलेको सरकारले लोकतान्त्रिक मूल्य र संविधानको मर्मलाई कमजोर बनाउने गरी काम गरिरहेको छ, जसले देशमा अस्थिरता र अविश्वास बढाएको छ।
