काठमाडौं । प्रधानमन्त्री केपी शर्मा ओलीले संक्रमणकालीन न्यायसँग सम्बन्धित बाँकी कामहरूलाई पूर्णता दिनु सरकारको उच्च प्राथमिकता रहेको बताएका छन्।
बुधबार प्रतिनिधिसभाको बैठकमा सांसदहरूले उठाएका प्रश्नहरूको जवाफ दिँदै प्रधानमन्त्री ओलीले शहीद, बेपत्ता र द्वन्द्वपीडितहरूको योगदानलाई सम्मान गर्दै पीडितलाई न्याय दिन सरकार दृढ रहेको स्पष्ट पारे।
‘संविधानले निर्देशन गरेअनुसार शहीदहरू, बेपत्ता र द्वन्द्वपीडितहरूको बलिदानको कदर गर्दै संक्रमणकालीन न्याय प्रक्रिया टुङ्ग्याउने विषयमा सरकार प्रतिबद्ध छ,’ प्रधानमन्त्री ओलीले भने, ‘सरकार द्वन्द्वपीडितहरूसँग निरन्तर छलफल गरिरहेको छ।’
प्रधानमन्त्री ओलीले ‘बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग ऐन, २०७१’ अनुसार आयोग गठन भई काम सुरु भइसकेको उल्लेख गरे। उनले आयोगका पदाधिकारीहरूले पीडित पक्षसँग संवादमार्फत बाँकी कार्यहरू अघि बढाउने विश्वास व्यक्त गरे।
ओलीले संक्रमणकालीन न्याय शान्ति प्रक्रियाको संवेदनशील र साझा सरोकार भएको भन्दै सबै पक्षको सहयोग आवश्यक रहेकोमा पनि जोड दिए।
