काठमाडौं। गत भदौ २३ र २४ गतेको भएको जेनजी आन्दोलनका क्रममा राज्यबाट भएको दमन तथा विध्वंस घटना जाँचबुझ गर्न बनेको गौरीबहादुर कार्कीको आयोगको प्रतिवेदन सार्वजनिक भइसकेको छ।
आयोगले सरकारी दमनमा तत्कालीन प्रधानमन्त्री केपी शर्मा ओली, गृहमन्त्री रमेश लेखक, नेपाल प्रहरीका आइजिपी चन्द्रकुवेर खापुङ, गृहसचिव गोकर्णमणि दुवाडी, सशस्त्र प्रहरीका आइजिपी राजु अर्याल, राष्ट्रिय अनुसन्धान विभागका प्रमुख हुतराज थापा र काठमाडौंका सिडिओ छविलाल रिजालसहितका कारबाहीको सिफारिस गरेको छ।
तर, त्यसको भोलिपल्ट अर्थात् सिंहदरबारसहितका संरचना जलाउनेबारे भने अनुसन्धान अधुरो छ। हुन् त आयोगले नै थप अनुसन्धान गर्न औंल्याएको छ।
‘भदौ २४ गते सरकारले कफ्र्यु आदेश जारी गर्दा गर्दै पनि सरकारी सम्पत्ति, राजनीतिक दलका पार्टी कार्यालय, राजनीतिक दल सम्बद्ध व्यक्तिको निजी सम्पत्तिमाथि तोडफोड, आगजनी तथा लुटपाटसमेत भएको र उक्त घटनाले अकल्पनीय रूपमा भौतिक तथा मानवीय क्षति हुन गएको थियो,’ प्रतिवेदनमा उल्लेख छ।
सिंहदरबार, संघीय संसद् भवन, सर्वोच्च अदालत, राष्ट्रपति भवन जस्ता राष्ट्रिय धरोहर जलाउनमा विशेष प्रज्वलनशील पदार्थको प्रयोग गरिएको प्रतिवेदनमा उल्लेख छ।
यद्यपि, आयोगले शान्तिपूर्ण प्रदर्शनलाई उग्र बनाउन टीओबी समूहले भूूमिका खेलेको उल्लेख गरेको छ। ‘भदौ २३ गते करिब १२ बजेको समयमा चाबहिल ओम अस्पताल, धोबीखोला करिडोर, गौशालालगायत विभिन्न क्षेत्रबाट करिब १०० वटा मोटरसाइकलमा बानेश्वर, बिजुलीबजारतिरबाट आएका ९केहीले टीओबी लेखिएको कालो टी–सर्ट लगाएका० युवाहरूले मोटरसाइकल पड्काउँदै होहल्ला गरी भीडलाई थप उत्तेजित बनाउने कार्य गरेको देखिन्छ,’ प्रतिवेदनमा भनिएको छ।
