काठमाडौं । कारागार व्यवस्थापन विभागले गत भदौ २३ र २४ गते ‘जेनजी’ पुस्ताको प्रदर्शनका क्रममा विभिन्न स्थानबाट भागेका कैदी बन्दीलाई यही असोज २० गतेभित्र कारागार फर्कन आग्रह गरेको छ।
विभागले गृह मन्त्रालय, सुरक्षा निकाय र सरोकारवालासँगको सहयोगमा कैदी बन्दीलाई फिर्ता ल्याउने कार्य भइरहेको जनाउँदै ‘फरार बन्दी खोजी तथा पक्राउ कार्यदल’ समेत गठन गरिएको जानकारी दिएको छ।
निर्देशक एवम् प्रवक्ता चोमेन्द्र न्यौपानेका अनुसार अझै पनि ठूलो संख्यामा कैदीबन्दी कारागार बाहिर रहेका छन्। तोकिएको म्यादभित्र नफर्कनेका हकमा प्रचलित कानुनअनुसार कारबाही हुने उनले स्पष्ट पारे।
फरार अवस्थामा रहेका कैदीबन्दीलाई लुकाउने वा आश्रय दिने व्यक्तिमाथि पनि कानुन बमोजिम कारबाही हुने चेतावनी विभागले दिएको छ। यसका लागि जिल्लास्तरमा जनप्रतिनिधि र सम्बन्धित निकायसँग छलफल गर्ने, समन्वय गर्ने तथा आवश्यक परेमा अन्य संयन्त्र प्रयोग गर्ने कार्यादेश दिइएको छ।
भागेका कैदीबन्दीसम्बन्धी सूचना उपलब्ध गराउन विभागले सरोकारवालासमेतलाई आह्वान गरेको छ। यस्ता सूचना सञ्चारमाध्यम, सामाजिक सञ्जाल वा अन्य उपयुक्त माध्यममार्फत कार्यदल र सुरक्षा निकायलाई दिन सकिने व्यवस्था गरिएको विभागले जनाएको छ।
