काठमाडौं । नेपालमा जापानी इन्सेफलाइटिस (जेई) संक्रमणबाट मृत्यु हुनेको संख्या ३१ पुगेको छ। स्वास्थ्य सेवा विभागअन्तर्गत परिवार कल्याण महाशाखाको खोप शाखाले वैशाखयतासम्मको यो तथ्यांक सार्वजनिक गरेको हो।
खोप शाखाका प्रमुख डा. अभियान गौतमका अनुसार देशभर १,४०८ जनामा इन्सेफलाइटिस सिन्ड्रोमका लक्षण देखिएका मध्ये १६४ जनामा जेई संक्रमण पुष्टि भएको छ। पछिल्लो सात दिनयता पाल्पामा एक नयाँ केस र चितवनमा एक जनाको मृत्यु दर्ता भएको छ।
मृत्यु हुने ३१ जनामध्ये १६ पुरुष र १५ महिला रहेका छन्। पुष्टि भएका संक्रमितमध्ये ११६ जना अर्थात् ७१ प्रतिशत १५ वर्ष वा सोभन्दा माथिका छन्, भने मृत्यु हुनेमध्ये ७४ प्रतिशत ४० वर्षभन्दा माथिका व्यक्तिहरू छन्।
डा. गौतमका अनुसार जेई संक्रमण नेपालका पाँच प्रदेशका आठ जिल्लाका १२ नगरपालिकामा देखिएको छ। रोग पूर्वी भागबाट सुरु भई क्रमशः पश्चिमतर्फ फैलिएको छ। हालसम्म २२ वटा पहाडी जिल्लाबाट पनि संक्रमण पुष्टि भएको छ।
संक्रमित अधिकांश व्यक्ति धान खेत र सुँगुर फार्म नजिक बसोबास गर्ने रहेका छन्। विभागले संक्रमण नियन्त्रणका लागि जनचेतना र खोप अभियानलाई तीव्रता दिने तयारी गरिरहेको जनाएको छ।
