काठमाडौं । भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयको होस्टेलमा नेपाली छात्राको मृत्यु र त्यसपछि विकसित परिस्थिति बुझन नेपालले नेपाल प्रहरीका दुई वरिष्ठ अधिकारीलाई त्यहाँ पठाएको छ ।
नेपाली विद्यार्थीको अवस्था बुझ्न र त्यहाँ रहेका नेपाली विद्यार्थीलाई कलेजमा सुरक्षाको वातावरण मिलाउने सन्दर्भमा नयाँदिल्लीस्थित नेपाली राजदूताबासबाट नेपाल प्रहरीका २ वरिष्ठ अधिकारी मंगलबार विश्वविद्यालय पुगेका छन् ।
परराष्ट्रमन्त्री डा. आरजु राणाले घटनाको आवश्यक अनुसन्धानका लागि भारतीय सुरक्षाकर्मीसँग समन्वय गर्न तथा नेपाली विद्यार्थीलाई आवश्यक सहयोग र होस्टलमा सुरक्षित रूपमा रहनका लागि विश्वविद्यालय प्रशासनसँग समन्वय गर्न प्रहरीका वरिष्ठ अधिकारीहरूलाई पठाइएको जनाउँदै यस विषयमा नेपाली दूतावास दिल्लीले आवश्यक पहल गरिरहेको जनाएकी छन् ।
नेपालको कूटनीतिक प्रयासपछि कलेजले विद्यार्थीहरूलाई होस्टेलमा फर्कन अपिल गरिसकेको छ भने नेपाली विद्यार्थीलाई दुव्र्यवहार गर्ने कर्मचारीलाई कारबाही गरिसकिएको पनि उनले जनाएकी छिन् ।
यस विषयमा परराष्ट्र मन्त्रालय र नेपाली राजदूतावास दिल्लीले विश्वविद्यालय प्रशासन र भारतीय सुरक्षा अधिकारीको सम्पर्कमा रहेर आवश्यक समन्वयका साथ काम गरिरहेको पनि उनले उल्लेख गरेकी छन् ।
