काठमाडौं । नेपालको बाह्य आर्थिक सन्तुलन बलियो देखिए पनि आर्थिक वृद्धिको गति भने सुस्त रहने अन्तर्राष्ट्रिय मुद्रा कोष (आईएमएफ) ले प्रक्षेपण गरेको छ। आईएमएफको पछिल्लो ‘वर्ल्ड इकोनोमिक आउटलुक’ प्रतिवेदनअनुसार सन् २०२६ मा नेपालको आर्थिक वृद्धिदर ३.६ प्रतिशतमा सीमित हुनेछ।
सन् २०२५ मा ४.४ प्रतिशत वृद्धि हुने अनुमान गरेको आईएमएफले सन् २०२७ मा पनि नेपालको आर्थिक वृद्धिदर ३.७ प्रतिशत मात्रै पुग्ने जनाएको छ। यसले नेपालको अर्थतन्त्रले अपेक्षित गति लिन नसक्ने देखाउँछ।
तर बाह्य क्षेत्रको अवस्था भने तुलनात्मक रूपमा बलियो रहने अनुमान छ। सन् २०२६ मा नेपालको चालू खाता बचत कुल गार्हस्थ्य उत्पादन (जीडीपी) को १३.९ प्रतिशत पुग्ने प्रक्षेपण गरिएको छ। सन् २०२५ मा यस्तो बचत ६.६ प्रतिशत रहने अनुमान थियो। यद्यपि, सन् २०२७ मा बचत घटेर २ प्रतिशतमा झर्ने आईएमएफको आँकलन छ।
मूल्यवृद्धि पनि सन् २०२६ मा घटेर ३.१ प्रतिशतमा झर्ने अनुमान छ। तर सन् २०२७ मा मुद्रास्फीति बढेर ५.८ प्रतिशत पुग्ने प्रक्षेपण गरिएको छ।
क्षेत्रीय तुलनामा नेपालको आर्थिक वृद्धि कमजोर देखिन्छ। सन् २०२६ मा भारत र भुटानको अर्थतन्त्र ७ प्रतिशतका दरले विस्तार हुने अनुमान छ। भियतनामको वृद्धि ८.४ प्रतिशत पुग्नेछ। एसियाको औसत आर्थिक वृद्धिदर ४.८ प्रतिशत रहने प्रक्षेपण छ।
यसअनुसार नेपालले बाह्य आर्थिक सन्तुलन कायम राखे पनि उत्पादन, लगानी र रोजगारी विस्तारमार्फत आर्थिक वृद्धिको गति बढाउनुपर्ने चुनौती देखिएको छ।
