काठमाडौं । कर्णाली करिडोरअन्तर्गत हुम्लाको चुवाखोलामा नेपाली सेनाले निर्माण गरेको बेलिब्रिज पुलको उद्घाटनका लागि सुर्खेत पुगेका प्रधानमन्त्री केपी शर्मा ओलीको टोली मौसमका कारण सुर्खेतमै रोकिएको छ।
प्रधानमन्त्री ओली शुक्रबार बिहान ११ बजे नेपाली सेनाको हेलिकोप्टरमार्फत सुर्खेत आइपुगेका थिए। तर खराब मौसमका कारण उनको हुम्ला यात्रा प्रभावित भएको हो। ओलीसहितको टोली नेपाली सेनाको उत्तर–पश्चिम पृतना हेडक्वार्टरमा ४ घण्टादेखि मौसम खुल्ने प्रतीक्षामा बसेको छ।
“मौसम सफा हुने बाटो कुरेर बसेका छौं,” नेपाली सेनाका एक अधिकृतले जानकारी दिँदै भने, “हुम्लामा सम्पूर्ण तयारी भइसकेको छ, मौसम खुलेपछि जान्छौं।”
उक्त भ्रमणका लागि प्रधानमन्त्री आउँदा सेनाको हेलिकोप्टर प्रयोग गरिएको थियो। तर फर्कने बेला हेलिकोप्टर ढिलो हुन सक्ने भएकाले नेपाली सेनाको जहाजमार्फत फर्किने तयारी भएको छ। सेनाको विमान काठमाडौंबाट सुर्खेततर्फ उडिसकेको जनाइएको छ।
हुम्लामा नेपाली सेनाले निर्माण गरेको बेलिब्रिज उद्घाटन गर्ने कार्यक्रम तय गरिएको थियो। मौसमले साथ नदिँदा प्रधानमन्त्रीको उक्त कार्यक्रम प्रभावित भएको हो।
