काठमाडौं। स्वास्थ्य बिमा बोर्डले स्वास्थ्य बीमा कार्यक्रमअन्तर्गत सेवा दिने केही स्वास्थ्य संस्थाले बीमितसँग बीमाबाट समावेश हुने औषधि तथा औषधिजन्य सामग्रीसमेत नगदमा खरिद गर्न लगाएको गुनासो आएको भन्दै कारबाहीको चेतावनी दिएको छ।
बोर्डले जारी गरेको सूचनामा बीमाबाट समावेश भएका औषधि तथा सामग्री सेवा प्रदायक स्वास्थ्य संस्था वा बाह्य औषधि पसलबाट नगदमा खरिद गर्न लगाइएको पाइए स्वास्थ्य बीमा नियमावली, २०७५ अनुसार कारबाही गरिने उल्लेख गरिएको छ।
त्यस्तै, केही स्वास्थ्य संस्थाले बीमितलाई स्वास्थ्य बीमा मार्फत सेवा लिन अन्तिम समयसम्म कुराउने तथा अन्य बिरामीको तुलनामा विभेदपूर्ण व्यवहार गरेको गुनासोसमेत प्राप्त भएकाले यस्ता गतिविधि दोहोरिए स्वास्थ्य बीमा ऐन, २०७४ अनुसार कारबाही गरिने बोर्डले जनाएको छ।
बोर्डका अनुसार यस्ता कार्य दोहोरिए सम्बन्धित स्वास्थ्य संस्थासँग गरिएको सम्झौता पनि रद्द हुन सक्नेछ।
सूचनामा औषधि, औषधिजन्य सामग्री तथा सम्पूर्ण सेवाको दररेट बीमा सुविधा थैलीमा उल्लेखित दरभन्दा कम भए अस्पतालले न्यूनतम दरमा दाबी गर्नुपर्ने व्यवस्था रहेको स्मरण गराइएको छ। साथै, त्यस्ता दाबीहरू एपिआई मार्फत बीमा व्यवस्थापन सूचना प्रणालीमा अनिवार्य रूपमा क्लेम गर्न पनि बोर्डले आग्रह गरेको छ।
