एजेन्सी । बंगलादेशकी पूर्वप्रधानमन्त्री शेख हसिनालाई अन्तर्राष्ट्रिय अपराध न्यायाधिकरणले सुनाएको मृत्युदण्डलाई उनको पार्टी अवामी लिगले अस्वीकार गरेको छ। पार्टीले विज्ञप्ति जारी गर्दै अदालतको यो निर्णयलाई ‘दुर्भावनापूर्ण र प्रतिशोधबाट प्रेरित’ भनेको छ।
अवामी लिगले भनेको छ कि बंगलादेशका जनता, पार्टीका कार्यकर्ता तथा मुक्ति सङ्ग्रामका समर्थकहरूले यस निर्णयविरुद्ध व्यापक आन्दोलन सुरु गर्नेछन्। सोही क्रममा पार्टीले मंगलबार (नोभेम्बर १८) का लागि देशव्यापी बन्द घोषणा गरेको छ । साथै नोभेम्बर १९ देखि २१ सम्म देशभर विरोध प्रदर्शन गर्ने आह्वान गरिएको छ।
अन्तरिम सरकार र न्यायाधिकरणमाथि अवामी लिगको प्रश्न
अवामी लिगले अन्तरिम सरकार प्रमुख मोहम्मद युनुस र शेख हसिनामाथि सजाय सुनाउने न्यायाधिकरणलाई पूर्णतया अवैध, असंवैधानिक र ‘फाँसीवादी प्रवृत्ति’को प्रवर्तन गर्ने संस्था भनेर आरोप लगाएको छ। पार्टीले युनुस नेतृत्वको अन्तरिम सरकारले निर्वाचनमार्फत होइन, बल र दमनका माध्यमबाट सत्ता कब्जा गरेको दाबी पनि गरेको छ।
विज्ञप्तिमा भनिएको छ, ‘यो न्यायाधिकरण पूर्णतया गैरकानूनी, दुर्भावनापूर्ण र दुष्ट नियतले प्रेरित छ। युनुसले आफ्नो अवैध रूपमा कब्जा गरिएको शक्ति जोगाउन हसिनाविरुद्ध हिंसात्मक कदम चालेका छन्।’ पार्टीका अनुसार हसिनामाथि चलाइएको मुद्दा ‘ढोंगबाहेक केही होइन’।
मृत्युदण्डको कारण
अन्तर्राष्ट्रिय अपराध न्यायाधिकरणले पूर्वप्रधानमन्त्री हसिनालाई मानवताविरुद्धको अपराधमा दोषी ठहर गर्दै सोमबार मृत्युदण्डको सजाय सुनाएको थियो। गत वर्ष जुलाई–अगस्टमा भएको विद्यार्थी विद्रोहमाथि सरकारले गरेको कारबाहीका क्रममा १ हजार ४०० जनाको मृत्यु भएको ठहर गर्दै उनीमाथि कारबाही भएको हो। उनीसँगै तत्कालीन गृहमन्त्री असदुज्जमान खान कमललाई पनि मृत्युदण्ड सुनाइएको छ।
हसिना र कमल भारतमा आश्रित
सन् २०२४ अगस्ट ५ मा विद्यार्थी नेतृत्वको विद्रोह चर्किएपछि १५ वर्षे शासन चलाएकी प्रधानमन्त्री हसिना हेलिकप्टरमार्फत देश छाडेर भारत पुगेकी थिइन्। त्यतिबेलादेखि उनी भारतमै आश्रित छिन्। गृहमन्त्री कमल पनि त्यहीँ रहेको बताइएको छ।
फैसालापछि बंगलादेश सरकारले भारतसँग उनीहरूलाई फिर्ता पठाइदिन अनुरोध गरेको छ। भारतले भने हालसम्म स्पष्ट प्रतिक्रिया नदिएको बंगलादेशी अधिकारीहरूले जनाएका छन्।
