काठमाडौं। बिहीबार र शुक्रबार लगातार बढेको सुनको मूल्यमा साताको पहिलो दिन आइतबार भने सामान्य गिरावट आएको छ।
शुक्रबार एकैदिन तोलामा सात हजार दुई सय रुपैयाँले बढेको सुनको भाउ आज आइतबार भने प्रतितोला चार सय रुपैयाँले घटेको हो।
नेपाल सुनचाँदी व्यवसायी महासंघका अनुसार आज नेपाली बजारमा छापावाल सुन प्रतितोला दुई लाख ९० हजार तीन सय रुपैयाँमा किनबेच भइरहेको छ। यसअघि शुक्रबार सुनको मूल्य प्रतितोला दुई लाख ९० हजार सात सय रुपैयाँ पुगेको थियो।
सुनसँगै आज चाँदीको मूल्यमा पनि सामान्य गिरावट आएको छ। महासंघका अनुसार आइतबार चाँदीको मूल्य प्रतितोला १० रुपैयाँले घटेर चार हजार ६ सय पाँच रुपैयाँमा कारोबार भइरहेको छ। गत शुक्रबार चाँदी प्रतितोला चार हजार ६ सय १५ रुपैयाँमा कारोबार भएको थियो।
अन्तर्राष्ट्रिय बजारमा पनि बहुमूल्य धातुको मूल्य उच्च विन्दुमा रहँदै आएको छ। आज अन्तर्राष्ट्रिय बजारमा सुन प्रतिऔंस ४ हजार १ सय ७६ अमेरिकी डलरको आसपासमा कारोबार भइरहेको छ। अन्तर्राष्ट्रिय बजारकै उतारचढावका कारण नेपाली बजारमा पनि सुनचाँदीको मूल्य प्रभावित भएको व्यवसायीहरूले जनाएका छन्।
