काठमाडौं । काठमाडौंको म्हेपी मन्दिर परिसरमा आज चलचित्र ‘गोबर गणेश’ को शुभमुहूर्त सम्पन्न भएको छ। शुभमुहूर्तमा निर्देशक मरिचमान श्रेष्ठ (बल्छी धुर्बे) सहित चलचित्रका अधिकांश कलाकारको उपस्थिती रहेको थियो।
शुभमुहूर्तमा क्यामेरा पूजा गर्दै सट लिइएको थियो। कलाकार केदार घिमिरे (‘माग्ने बुढा’) ले नरिवल फोडेका थिए भने रवि गिरी ले क्ल्याप हानेर सुचारु गरिएको थियो।
चलचित्रको छायांकन पनि आजैबाट सुरु भएको छ। काठमाडौंबाट सुरु भएको छायांकन पोखरा लगायतका स्थानमा हुनेछ। निर्देशक श्रेष्ठका अनुसार करिब ३५ दिनको छायांकन सेड्युल तय गरिएको छ। उनले भने, “हाम्रो कला र सिपले भ्याएसम्म राम्रो काम गर्ने प्रयास गर्नेछौँ। दर्शकले सानो पर्दामा जस्तो साथ दिनुभयो, ठुलो पर्दामा पनि त्यसै गरिदिने विश्वास छ।”
‘गोबर गणेश’ माघ १ गते रिलिज हुने छ। यो मरिचमान श्रेष्ठको पहिलो फिचर फिल्म निर्देशन हो। उनले अघिल्लो समयमा टेलिचलचित्र ‘हल्का रमाइलो’ र ‘जुठे’ निर्देशन गरी दर्शकमाझ लोकप्रियता पाएका छन्।
चलचित्र बल्छी धुर्बे फिल्मस प्रस्तुतिमा निर्माण भइरहेको छ। अभिनेत्रीको रूपमा वर्षा सिवाकोटी र अन्य कलाकारमा मरिचमान श्रेष्ठ, विनोद न्यौपाने, पदम तामाङ, विल्सनविक्रम राई, निर्मल शर्मा, लक्ष्मीनाथ तिमल्सेना, राजु याक्छा, रामप्रसाद खनाल, सन्तोष बानियाँ, सन्दीप लामा, माओत्से गुरुङ, सीतादेवी तिमल्सिना, पुजन घिमिरे (पुकु) रहेका छन्।
चलचित्रमा तारानाथ न्यौपाने चिफ एडिटर, योगेशकाजी शाह बिजिएम, शंकर पाण्डे प्रोडक्सन, शिवराम श्रेष्ठ डीओपी र विपिन मल्ल सम्पादक रहेका छन्। टौवा स्टुडियो पब्लिसिटी डिजाइन र ओएसआर डिजिटल डिजिटल पार्टनरको रूपमा संलग्न छ। नेपालमा वितरण श्री ब्याकटेस इन्टरटेनमेन्टले गर्नेछ।
