काठमाडौं । अनिल बुढा मगर निर्देशित फिल्म ‘घरज्वाइँ’को दोस्रो गीत सार्वजनिक भएको छ। ‘यानीमाया’ बोलको गीतमा फिल्मका मुख्य कलाकारद्वय दयाहाङ राई र मिरुना मगर फिचर्ड छन्। हर्क साउदको शब्द रहेको गीतमा रचना र मनोज थापा मगरको संगीत तथा स्वर छ।
यही गीतको रिदममा सिनेमाको ब्याकग्राउन्ड म्युजिक तयार गरिएको निर्देशकले केही दिनअगाडि आयोजित सिनेमाको ट्रेलर रिलिज कार्यक्रममा बताएका थिए।
अनिल बुढा मगरको कथा र निर्देशनमा बनेको फिल्म मगर संस्कृतिमा आधारित छ। जनक घर्ती मगर निर्माता रहेको फिल्मको पटकथा अनिलसहित विनोद खतिवडा र सुभास कोइरालाले लेखेका हुन्।
बुद्धि तामाङ, पुष्कर गुरुङ, शिशिर बाङ्देल, राज थापा, कविता आले, शिला आले, अनु थापा, बिना थापा मगर, खड्कबहादुर पुन (खबपु), विवेश बुढा मगर र सुनिल मगरलगायतले फिल्ममा अभिनय गरेका छन्।
सुसन प्रजापतिले खिँचेको फिल्मको छायांकन पूर्वीरुकुम र तकसेराका विभिन्न ठाउँमा गरिएको हो।
यो फिल्म यही असार २८ गते रिलिज हुँदै छ।
