काठमाडौं । हिमालयन बैंक लिमिटेडको थप सार्वजनिक निष्काशन (एफपीओ) अर्को साता मात्र बाँडफाँड हुने भएको छ। बिक्री प्रबन्धक सिटिजन्स क्यापिटल लिमिटेडले एफपीओ बाँडफाँडको सम्पूर्ण प्रक्रिया तयारी भइरहेकाले आगामी साता बाँडफाँड गरिने जानकारी दिएको हो।
बैंकले असार ३२ गतेदेखि साउन ४ गतेसम्म एफपीओ निष्काशन गरेको थियो। उक्त एफपीओमा अत्यधिक आवेदन परेको छ।
१७ लाखभन्दा बढीको आवेदन, गोलाप्रथाबाट बाँडफाँड
एफपीओमा १७ लाख ८६ हजार ७८२ जना आवेदकले कुल ४ करोड ९ लाख ६६ हजार ५०० कित्ताका लागि आवेदन दिएका छन्। यो संख्या मागभन्दा ४.४२ गुणाले बढी हो।
बैंकले प्रतिसेयर १०० रुपैयाँ अंकित मूल्यमा ५७ रुपैयाँ प्रिमियम थप गरी १५७ रुपैयाँमा ९२ लाख ५० हजार ४६९ कित्ता एफपीओ निष्काशन गरेको थियो।
करिब ८ लाख बढी आवेदकको हात खाली
गोलाप्रथाबाट बाँडफाँड गर्दा जम्मा ९ लाख २५ हजार ४६ जनालाई मात्र सेयर पर्न सक्नेछ। बाँकी ८ लाख ६३ हजार ९१९ जनाले सेयर नपाउने निश्चित भएको छ।
एफपीओ बाँडफाँड पछि शेयर खरिद गरेका लगानीकर्ताको खातामा सेयर वितरण गरिनेछ भने बाँकीको आवेदन रकम फिर्ता गरिने बताइएको छ।
नेपाल धितोपत्र बोर्डले असार २२ गते बैंकलाई एफपीओ निष्काशनको स्वीकृति दिएको थियो। बैंकले सुरुमा १६९ रुपैयाँमा निष्काशन गर्ने प्रस्ताव गरेको भए पनि धितोपत्र बोर्डले मूल्य घटाएर १५७ रुपैयाँमा अनुमति दिएको थियो।
