काठमाडौं। अमेरिका र इजरायलको आक्रमणपछि इरानले जवाफी कारबाही गर्दा सुरु भएको युद्ध अझै अन्त्य भएको छैन।
यो युद्धका कारण मध्यपूर्वका देश तनावग्रस्त छन् भने त्यहाँ रहेका नेपाली मात्र होइन, नेपालको आयातसँगै बजार पनि प्रभावित भएको छ।
तर, सरकारले अन्तर्राष्ट्रिय तथा क्षेत्रीय संकटहरूको प्रभाव अध्ययन गर्न परराष्ट्रमन्त्री शिशिर खनालको संयोजकत्वमा उच्चस्तरीय अन्तरमन्त्रालय कार्यदल गठन गरेको छ। सोमबार गठन भएको कार्यदलमा परराष्ट्रसचिव अमृतबहादुर राई, अर्थसचिव घनश्याम उपाध्याय, श्रमसचिव दीपक काफ्ले, वाणिज्य सचिव मधुसूदन बुर्लाकोटी, ऊर्जासचिव चिरञ्जीवी चटौत र गृहसचिव राजकुमार श्रेष्ठ छन् । परराष्ट्रको पश्चिम एसिया महाशाखा प्रमुख सहसचिव रामकाजी खड्का कार्यदलको सदस्यसचिव रहेका छन्।
परराष्ट्र मन्त्रालयका प्रवक्ता लोकबहादुर पौडेल क्षेत्रीका अुनसार कार्यदलले युद्धका कारण अन्तर्राष्ट्रिय तथा क्षेत्रीय संकटहरूको प्रभाव अध्ययन र आवश्यक नीति तथा रणनीति तयार गर्नेछ । यो कार्य ३० दिनभित्र सम्पन्न हुनेछ ।
मध्य पूर्वी देशमा १७ लाख २९ हजार २८७ नेपाली छन् ।
