काठमाडौं । राष्ट्रिय परीक्षा बोर्डले सोमबार कक्षा १२ को नतिजा सार्वजनिक गरेको छ। वैशाखमा सम्पन्न परीक्षामा सहभागी विद्यार्थीमध्ये ६१.१७ प्रतिशत उत्तीर्ण भएका छन्। बोर्डका अनुसार यस वर्षको नतिजामा अघिल्लो वर्षको तुलनामा सुधार देखिएको छ। गत वर्ष ५२ प्रतिशत मात्र विद्यार्थी उत्तीर्ण भएका थिए।
बोर्ड अध्यक्ष महाश्रम शर्माका अनुसार अंग्रेजी, लेखा, सामाजिक र नेपाली विषयमा धेरै विद्यार्थी ‘नन ग्रेड’ भएका छन्। सैद्धान्तिकतर्फ न्यूनतम ३५ प्रतिशत अंक नल्याएका विद्यार्थीहरूको नतिजा लेटर ग्रेडिङ निर्देशिका २०७८ अनुसार ‘नन ग्रेडिङ’ भएको हो। यस पटकको परीक्षामा देशभरबाट ५ लाख ११ हजार विद्यार्थी सहभागी भएका थिए। तीमध्ये नियमिततर्फ ३ लाख ९५ हजार र आंशिकतर्फ १ लाख १५ हजार परीक्षार्थी थिए।
परीक्षा सञ्चालनका लागि देशभर १ हजार ५९१ परीक्षा केन्द्र तोकिएको थियो। जापानस्थित एभरेस्ट स्कुलका ३८ विद्यार्थीसमेत परीक्षामा सहभागी भएका थिए। ७७ वटै जिल्लाबाट विद्यार्थी परीक्षामा सहभागी भएका थिए। काठमाडौंबाट सबैभन्दा धेरै ६८ हजार विद्यार्थी सहभागी भए भने मनाङबाट सबैभन्दा कम ४५ जना मात्र सहभागी भएका थिए। काठमाडौंमा १६२ केन्द्रमा परीक्षा सञ्चालन भएको थियो भने मनाङ र मुस्ताङमा १/१ परीक्षा केन्द्र रहेका थिए।
