काठमाडौं । आफूमाथि लागेको सबै आरोप खारेज गर्दै व्यवसायी दुर्गा प्रसाईँले आफूलाई ‘अकबरे सुन’सँग तुलना गरेका छन्।
तीनकुने घटनापछि पहिलोपटक पत्रकार सम्मेलन गरेका प्रसाईँले आफू कुनै ठग नभएको दाबी गर्दै भने, “म अकबरे सुन हुँ। अकबरे सुनलाई जहाँ घोट्दा पनि पहेँलै आउँछ।” उनले आफूविरुद्ध कुनै ‘केटी काण्ड’ वा अन्य अभियोग लगाउन नसकिने जिकिर गरे।
प्रसाईँले भने, “तपाईंहरूको अगाडि अकबरे सुन छ, अब तपाईंहरूले घोटेर पानी खानुहोस्, कानमा लगाउनुहोस्, मलाई सदुपयोग गर्नुहोस्।”
उनले आफ्नो अभियान रोक्न राष्ट्रिय तथा अन्तर्राष्ट्रिय शक्ति लागेको आरोपसमेत लगाए। दिल्लीमा केही व्यापारी र तस्करहरूले ऋण तिर्ने प्रस्ताव गर्दै अभियान छोड्न दबाब दिएको तर आफू नबिकेको खुलासा पनि उनले गरे।
७८ दिन हिरासत र जेल जीवन बिताउँदा कुनै पश्चाताप नभएको बताउँदै प्रसाईँले भने, “मेरो छोरो हरेक दिन मलाई भेट्न आउँथ्यो। मैले चाहेको कुरा अरूका छोराछोरी पनि विदेशबाट फर्किएर आमा-बुबालाई भेट्न आउन् भन्ने हो।”
प्रसाईँले अब आफ्नो अभियानलाई राजनीतिक दलमार्फत अघि बढाउने घोषणा गरे। उनले भने, “अब मैले आम नागरिकको इच्छाअनुसार राजनीतिक दल खोलेर अघि बढ्ने निश्चय गरेको छु। केही समयमै दलको नाम घोषणा गर्नेछु।”
उनले अबको आन्दोलनलाई आर्थिक क्रान्ति भन्दै संविधानले जनतालाई खान-लाउन नदिने, गरिबको घर-जग्गा फिर्ता हुनुपर्ने विचार अघि सारे।
