वीरगन्ज । धनुषाको धनुकमला नगरपालिका–६ सखुवा मरानस्थित मस्जिदमा तोडफोड र धार्मिक ग्रन्थ कुरान जलाइएको घटनाको विरोधमा वीरगन्जमा आइतबार बिहानैदेखि मुस्लिम समुदायले प्रदर्शन गरेका छन्।
शनिबार अज्ञात समूहले मस्जिदमा तोडफोड गरी कुरान जलाएको घटना सामाजिक सञ्जालमार्फत सार्वजनिक भएपछि त्यसको विरोधमा प्रदर्शन सुरु भएको हो। प्रदर्शनकारीले वीरगन्जको घण्टाघर, मुर्ली, छपकैया इदगाह चोक लगायतका स्थानमा सडकमै टायर बालेर नाराबाजी गरेका थिए।
छपकैया इदगाह चोकमा प्रदर्शनका क्रममा प्रहरी र प्रदर्शनकारीबीच सामान्य झडप भएको छ। स्थिति उग्र बनेपछि प्रहरीले भीड नियन्त्रणका लागि ५ राउण्ड अश्रुग्यास प्रहार गरेको थियो। घटनामा एक जना प्रहरी सामान्य घाइते भएका छन्।
प्रदर्शनकारीहरूले मस्जिदमा तोडफोड गर्ने र धार्मिक ग्रन्थ जलाउनेलाई तत्काल पक्राउ गरी कडा कारबाही गर्न माग गरेका छन्। छपकैया मदरशाका मौलाना असगर मदमीले धार्मिक सद्भाव बिगार्ने उद्देश्यले यस्तो कार्य भएको भन्दै दोषीलाई तुरुन्तै कानुनी दायरामा ल्याउन सरकारसँग माग गरे।
