काठमाडौं । संसद् दिवस २०८२ को अवसरमा सभामुख देवराज घिमिरेले दलहरूबीच संवाद, सहकार्य र दलीय सहमतिका माध्यमबाट संसद्को गरिमा उच्च राख्न आग्रह गरेका छन्। उनले संसद्लाई जनअपेक्षानुसार प्रभावकारी, उत्तरदायी र जनमुखी बनाउनु आवश्यक रहेको उल्लेख गरे।
सभामुख घिमिरेले संसद् दिवसको शुभकामना सन्देशमार्फत लोकतन्त्र र संविधानवादको संरक्षणमा योगदान पुर्याउने शहीदप्रति श्रद्धाञ्जली अर्पण गर्दै जनप्रतिनिधि र नागरिक समाजको भूमिकाप्रति आभार प्रकट गरे।
उनले भने, “संसद् वादविवाद होइन, संवादको थलो हो। विचार फरक भए पनि साझा राष्ट्रिय सरोकारमा सहमति अपरिहार्य छ।”
नेपालमा पहिलो निर्वाचित प्रतिनिधिसभाको बैठक बसेको दिनको स्मरणमा प्रत्येक वर्ष असार १६ गते संसद् दिवस मनाइन्छ। सभामुख घिमिरेले लोकतन्त्रको आत्मा जनसहभागितामा निहित रहेको उल्लेख गर्दै नीति निर्माणदेखि कार्यान्वयनको निगरानीसम्म संसद्को भूमिका अत्यन्त महत्वपूर्ण भएको बताए।
उनले संविधानको मर्म अनुसार करसम्बन्धी सबै प्रस्ताव संसद्मा प्रस्तुत गर्नुपर्ने व्यवस्थाको पनि स्मरण गराउँदै, संसद्को माध्यमबाट जनताको अभिमत अनुरूप नीति तथा कानून सुनिश्चित गर्नुपर्नेमा जोड दिए।
