काठमाडौं । महाधिवेशनको मिति र प्रक्रिया टुंगोमा पुग्न नसकेपछि नेपाली कांग्रेसले भोलिदेखि बस्ने भनिएको केन्द्रीय कार्य समितिको बैठक दुई दिनपछि सार्ने निर्णय गरेको छ। अब बैठक असोज २८ गते बस्ने भएको पार्टीका प्रवक्ता प्रकाशशरण महतले जानकारी दिए।
महतका अनुसार त्यसअघि पदाधिकारी र पूर्वपदाधिकारीबीच महाधिवेशनबारे थप छलफल गरेर निष्कर्षमा पुग्ने प्रयास गरिनेछ।
“अधिवेशन कहिले र कसरी गर्न सकिन्छ भन्ने विषयमा वृहत्तर छलफल भयो,” महतले भने, “हामी सबै चाहन्छौँ, अधिवेशन छोटो समयमा होस्, तर त्यो विधिसम्मत, प्रक्रियासम्मत र सबैको सहभागितासहित हुनुपर्छ। व्यवहारिक समयबारे भने अझै निष्कर्षमा पुग्न सकेका छैनौँ।”
उनका अनुसार कार्यसम्पादन समितिको सिफारिसअनुसार केन्द्रीय समितिको बैठक स्थगित गरिएको हो। “छलफलमार्फत निष्कर्षमा पुग्न सकेपछि बैठक छिट्टै सम्पन्न गरी पार्टीलाई एकताबद्ध र परिचालित बनाउने तयारीमा छौँ,” उनले थपे।
जेनजी आन्दोलनपछि पहिलो पटक बिहीबारदेखि सुरु भएको पदाधिकारी र पूर्वपदाधिकारीको बैठकमा आगामी महाधिवेशनबारे विस्तृत छलफल भएको थियो।
बैठकमा महामन्त्री गगन थापा र विश्वप्रकाश शर्माले मंसिरभित्रै नियमित महाधिवेशन गर्नुपर्ने, त्यो सम्भव नभए विशेष महाधिवेशन गर्ने प्रस्ताव राखेका थिए। तर नेताहरूबीच पूर्ण सहमति जुट्न नसकेपछि बैठकलाई केही दिन सारिएको हो।
ललितपुरको सानेपास्थित आगलागीग्रस्त केन्द्रीय कार्यालयमा बसेको बैठक सभापति शेरबहादुर देउवा अनुपस्थितिमा उपसभापति पूर्णबहादुर खड्काको अध्यक्षतामा सम्पन्न भएको थियो।
