काठमाडौं । नेपाली कांग्रेसका केन्द्रीय सदस्य अर्जुननरसिंह केसीले पुराना राजनीतिक दलप्रति जनताको विश्वास कमजोर हुँदै गएको बताएका छन्। कांग्रेस केन्द्रीय समिति बैठकमा धारणा राख्दै नेता केसीले जनतामा “पुराना पार्टीले काम गर्दैनन्” भन्ने सोच गहिरिँदो अवस्थामा पुगेको बताए।
‘विगत केही वर्षदेखि राजनीतिक दलप्रति जनताको भरोसा टुटिरहेको छ,’ उनले भने, ‘पुराना पार्टीले काम गर्दैनन् भन्ने मान्यता बनिसकेको छ। अब पनि गम्भीर भएर सोचिएन भने परिस्थिति गम्भीर बन्छ।’
उनले पार्टीभित्रको गुटउपगुट र संस्थाभन्दा व्यक्ति प्रधान हुने प्रवृत्तिले कांग्रेस कमजोर भएको उल्लेख गर्दै, ‘हामी गुट–उपगुटमा विभाजित छौं। कांग्रेस व्यक्ति प्रधान होइन संस्था प्रधान हुनुपर्छ,’ भने।
नेता केसीले महाधिवेशन समयमै गर्नुपर्नेमा पनि जोड दिए। ‘पार्टीको वैधानिकता र अस्तित्व जोगाउन महाधिवेशन २०८२ भित्रै गर्नुपर्छ,’ उनले भने।
त्यस्तै उनले पार्टी अनुशासन समितिको कामप्रति पनि प्रश्न उठाउँदै निष्पक्षता र पारदर्शिताको खाँचो औंल्याए। ‘अनुशासन समितिले मनपरी ढंगले निर्णय गरिरहेको छ। इज्जत प्रतिष्ठाको ख्याल नगरिएको छ,’ उनले भने, ‘पार्टीभित्र एक पक्षले अर्को पक्षलाई दबाउन खोजिएको छ भने त्यसको प्रतिकार गर्न हामी तयार छौं।’
अनुशासन समितिको निर्णयप्रति असन्तुष्टि जनाउँदै उनले आफूलाई अनसनमा बस्नुपर्ने अवस्था आउन सक्ने चेतावनीसमेत दिए।
केसीको धारणा पार्टीभित्रको असन्तोष र आन्तरिक खिचातानी अझै गहिरिँदै गएको संकेतका रूपमा लिइएको छ।
